eSefarad Noticias del Mundo Sefaradi
Keridos amigos,
Mi emisyon de oy djueves va ser sovre el Gran Mufti. La semana pasada, no tuve tyempo de avlar de sus krimenes de mansevez…
Los ke van a kerer oirme en direkto lo podran indosen a las 4 h 06 PM, ora de Paris, sovre http://www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
EL GRAN MUFTI DE YERUSHALAYIM
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora las emisyones de Radio J se pueden oir sovre internet. Mi emisyon se puede oir sovre el sityo de Radyo J sea en direkto sea kuando se kyere, indose al kavo de la redifuzyon de la emisyon del djueves a la tadre.
De otra parte, vos akodro tambyen ke los atelyes de konversasyon de Vidas Largas empesaron de muevo, i el proksimo se va tener el martes a venir 17 de novyembre, de las dos a las kuatro, en el Centre Communautaire.
La semana pasada vos avli de Hadj Amin El Husseini, Gran Mufti de Yerushalayim del tyempo, entre otros, de la gerra, i del patirdi ke izo una deklarasyon de Bibi Netanyahu. Esto me tomo la emisyon entera, i vos dishe a esta okazyon:
«No me vo apezgar mas sovre el Mufti en una emisyon de vente minutos. Tendriya menester de ora entera para kontar todos sus krimenes. Krimenes ke no pago, nunka fue djuzgado, i kale dizir ke es la Fransya ke le permetyo de fuir i eskabuyirse, ama esto es otra istorya.»
Si no ora entera, otrunos 20 minutos me paresen menester para akodrarvos lo ke fue este kriminal durante su vida entera, ke fue bastante larga.
Mohammed Amin al-Husseini nasyo en Yerushalayim en julyo 1895, dunke del tyempo ande los Turkos Osmanlis reynavan en Palestina, en una de las grandes famiyas arabas de Palestina, la famiya Husseini. Su padre es Mufti de Yerushalayim. El Mufti es la mas grande otoridad relijyoza en un pais.
En Palestina, syendo ke el poder politiko pertenese a governadores turkos, la sola otoridad araba es la otoridad relijyoza, ke es la del Mufti. El es ke reprezenta los arabos de Palestina frente a los turkos, de la misma manera, zaten, ke es el haham bashi de Estambol ke reprezenta a los djudyos de Turkiya frente al Sultan.
Amin al Husseini es embiyado en la Universidad de Al Azhar, al Kairo, para estudyar la ley islamika, i despues se va en una eskola de Estambol. A los 18, en 1913, se va azer el pelegrinaje de La Meka, lo ke le da despues el derecho de tener un turban blanko i de adjuntar Hadj a su nombre: agora se va yamar Hadj Amin Al Husseini.
Durante la primera gerra mundyala, entra en la armada osmanliya, i despues, no se save byen komo i kuando, se topa a la kontra en la armada ingleza. No vos olvidesh ke, en 1917, los Inglezes, reprezentados por Balfour, an prometido un ogar djudyo en Palestina. La Palestina, en 1917, es lo ke se yaman oy Israel, Cisjordaniya i Jordania.
Despues de la gerra, los arabos son dirijidos por Faysal ibn Hussein, el ke a organizado la rebuelta araba kontra los turkos i a konkistado la Syria. En janvier 1919, Faysal firma kon Weizmann un akuerdo asigun el kual los djudyos tendran un ogar nasyonal en Palestina si Faysal, de su lado, obtyene un reyno ancho i independyente.
Ama Hadj Amin, el, no es de akodro. Entra en Al Nadi, un grupo ke kyere la independensya de la Palestina, para los arabos i no para los djudyos.
En avril 1920, por la fyesta dicha de Nabi Mussa (el profeta Moshe) los arabos vyenen en Yerushalayim para azer manifestasyones kontra el syonismo. La polisiya i la armada ingleza son muy flakas frente a djente ke kyere atakar a los djudyos. Wladimir Jabotinsky reune una fuersa djudiya de unos syenes de mansevos, ama no tyenen armas, sino unas kuantas eskondidas. Empushados por nasyonalistos fanatikos komo muestro amigo Hadj Amin, ke dainda es un mansevo de 25, los arabos atakan a djudyos de la vyeja sivdad, sovre todo vyejos hahamim en vedra antisyonistos, i van a azer 5 matados i mas de 200 firidos.
Embezados por los evenimyentos de estos diyas de avril 1920, vyendo el ayudo ke los ombres de Jabotinsky trusheron a los djudyos – por egzemplo los de la parte oeste de Yerushalayim no an sido danyados – los dirijantes syonistos van a organizar una fuersa armada de defensa, ke se va yamar Hagana, lo ke kyere dizir defensa en lashon.
Es importante de saver ke los djudyos se organizaron militarmente solo despues de 1920, porke eran atakados i para pueder defenderse.
Hadj Amin es kondenado a 10 anyos de prezo por los Inglezes, ama se fuye i en julyo el Alto Komisaryo lo grasiya, komo todos los kondenados inkluyendo Jabotinsky.
Un anyo solo despues, en la primavera de 1921, los arabos, de muevo empushados por Hadj Amin, empesaron la misma koza en Jaffa, atakandosen a los djudyos, ama esta vez, los djudyos, ambezados por lo ke se teniya pasado el anyo de antes, se defendyeron, i uvo 47 muertos djudyos, ama tambyen 48 muertos arabos.
Entremyentres, el ermano de Hadj Amin, ke era Gran Mufti, vyene a morir. Asigun la ley, ay eleksyones para elijir su suksesor, i pertenese al Gran Komisaryo ingles de eskojerlo entre los tres primeros de las eleksyones. Hadj Amin es solo kuatren i no tyene dunke derecho de ser eskojido, ama yene el es ke se topa eskojido por el Gran Komisaryo, ke kyere kedar kon buenas kon la famiya Husseini. Me parese ke fue uno de los mas grandes yerros de los inglezes – ke izyeron munchos – ke de eskojer tal fanatiko, solo aedado de 26 anyos, ke veniya de ser kondenado a diez anyos de prezo solo un anyo antes, komo kapo relijyozo de los Palestinyanos.
En el mismo anyo 1921, los inglezes kortan la Palestina i travan la mas grande parte, la parte este, para formar el Emirato hashemito de Transjordaniya ke es dado a Abdallah, ermano de Faysal de Irak.
Ocho anyos despues, en agosto 1929, de muevo los arabos atakan a los djudyos i es una grande matansina ke aze 133 muertos ande los djudyos, inkluyendo 67 en la sola sivdad de Hebron. Kale dizir ke los matados djudyos uvyeran sido muncho mas si no aviyan topado refujyo ande vezinos arabos. La Komisyon ingleza de enkuesta dize ke esta vez Hadj Amin no es responsavle de las matansinas, ama las orijenes de estas matansinas son, komo oy, falsas rumores asigun las kualas los djudyos kyeren atakar a los lugares santos muzulmanes de Yerushalayim, i yo meldi ke Hadj Amin, agora Gran mufti, no era inosente de estas rumores.
En 1933, kuando Hitler suve al poder, el Mufti le aze saver, a traves el General SS Karl Wolff, ke esta tresalido de su viktorya i ke augura ke el fascismo se va espander en toda la rejyon; ke tyene las mismas ideas ke Hitler a propozito de los djudyos, i ke kyere azer la misma koza en todo el mundo islamiko.
Los Nazis espanden sus influensa sovre los nasyonalistos arabos, asta ke, en 1936, el Mufti sea yamado tambyen kapo del Alto Komité arabo, i ke el empese una grande rebuelta araba kontra los inglezes i los djudyos, reklamando un estado arabo sin los unos ni los otros.
Para apasiguar las kozas, los inglezes forman una komisyon yamada Komisyon Peel, ke va propozar dos estados: un djudyo i un arabo. Los djudyos achetan, ama los arabos refuzan.
El alto Komité arabo (komandado por Hadj Amin) demanda a toda la povlasyon araba de yevar la kefyeh en vez del tarbush (o fez) turko ke yevava la djente de la sivdad.
La rebuelta kontinua. El komisaryo ingles Andrews es asasinado en Nazareth. Los inglezes azen venir 20.000 muevos askeres de Igletyerra, i van a eskapar por ganar militarmente kontra esta rebuelta, ayudados por los djudyos.
Hadj Amin es ovligado de fuir verso el Levanon i desdpues el reyno de Irak.
En vedra, esta viktorya militar de los inglezes es una terrivle desfecha para los djudyos, porke en mizmo tyempo, para apasiguar a los arabos, los inglezes avren el dicho Livro Blanko, asigun el kual la immigrasyon djudiya no puede ser de mas de 75.000 en sinko anyos (los sinko anyos durante los kualos 6 milyones de djudyos van a ser matados) i despues ni uno, i las venditas de tyerras a los djudyos son proibidas en kaji todos los territoryos.
Se puede dizir ke afillu si militarmente los arabos pedryeron kontra los Inglezes, en vedra ganaron kontra los djudyos. No tengo menester de dizirvos la trajediya ke fue la serradura de las fronteras de la Palestina para los desmazalados djudyos entre 1939 i 1948.
Asigun el calendaryo del United States Holocaust Memorial Museum, en janvier 1941, Al Husseini se va bivir en Almanya. Demanda a Hitler de rekonoser la independensya de los estados arabos de las leyes kolonyales inglezes i fransezas; el derecho por los estados arabos de formar una unyon; i el derecho por las otoridades independentes arabas en Palestina de eliminar el ogar djudyo propozado por los inglezes.
En avril del misùmo anyo 1941, sostyene la tomadura del poder en Irak por Rachid Ali Al Gaylani, amigo de los nazis almanes, vyene avlar a la radyo del Irak para pronunsyar una fatwa yamando los muzulmanos al djihad kontra los Inglezes. Resive paras de Almanya para organizar una mueva rebuelta araba en Palestina. Ama komo son los inglezes ke ganan en Irak, es ovligado ce fuir en Iran. Esto dicho, kuando los inglezes entran en Bagdad el 1 de junyo 1941, los Irakis matan a 128 poveretos djudyos.
Komo los inglezes i los Rusos okupan al Iran, Al Husseini es yene ovligado de fuir, i se va en Italya ande el 27 de oktobre ve a Mussolini ke le dize achetar su propozisyon.
Despues de esto, se va de muevo en Almanya, i esta vez es resivido por Hitler el 28 de novyembre 1941. No me vo apezgar sovre esta entrevista, syendo ke es de esto ke vos avli la semana pasada. Malorozamente, no tengo nada de muevo de dizirvos sovre esta entrevista: pensava topar la fuente de la deklarasyon de Dieter Wisliceny ke vos meldi la semana pasada, ama dainda no la topi.
Yene vos akodro ke Hitler aseguro Amin en esta entrevista ke » el eskopo de la Almanya seriya solo la estruisyon del elemento djudyo morando en la sfera araba basho el protektorato britaniko». En otros byervos, Hitler kyere konkistar a las tyerras arabas, ama no ay de sikilearse: es solo para destruir los djudyos ke aya se topan.
Amin tresalido empesa, en 1942, emisyones de radyo ande dize ke los djudyos son los enemigos komunes del islam i de la Almanya nazi i ke kale estruirlos.»Kale matar a los djudyos ande se topan, es la veluntad del Dyo».
En Berlin se avre el Instituto sentral Islamiko en desyembre 1942. Aya Amin dize ke los djudyos son los peores enemigos del Islam.
Amin frekuenta Himmler, kapo de la SS i de la Gestapo, organizador de la solusyon finala kon Eichmann de basho de el. Munchas son las fotos ande se ven en djuntos Himmler i el Husseini, bevyendo i ryendo komo grandes amigos asasinos.
No kale enkantarse, en estas kondisyones, si es admetido ke Amin djugo un rolo personal en la shoa, kuando solo seriyan sus letras a los dirijantes de Bulgariya para ke no deshen irse 5.000 kriaturas djudiyas ke grasyas a Amin seran embiyadas a Auschwitz.
Es konosido tambyen por tener fundado la 13ena divizyon de montanya de la Waffen SS Handshah, kompozada de veluntaryos muzulmanos de Bosniya, vestidos de uniformes de SS almanes. I se ve en munchas fotos Amin azyendo el saludo nazi i pasando en revista a estos askeres.
A la fin de la gerra, los yugoslavos lo bushkan komo kriminal de gerra. Ama son los fransezes ke lo topan en Almanya i lo aferran.
Es yevado en Fransya, ama no en prezo. Se va kedar en una ermoza villa, su komida es traida de la gran meshkita de Paris. La Fransya refuza las demandas de ekstradisyon de los inglezes i de los Yugoslavos, i ayuda a su salida del pais, kon un falso pasaporte ke le da el ministeryo de los echos ajenos kon una otra alkunya.
Una vez de muevo ande los arabos, Amin se topa de muevo ser el Prezidente del Alto Komité Arabo. Es el sovrino de Amin, Abd el Kader El Husseini, ke komanda a los kombatantes arabos kontra los Djudyos. Lo ke kyere Amin no troko: ke los Inglezes se vaygan, i ke ayga un estado arabo en la entera Palestina. Komo ya lo savesh, no se paso ansina.
Los inglezes fueron d’akodro para irse, ama la ONU en novyembre 1947 voto un plano kon dos estados en Palestina: un djudyo, i un arabo. Los djudyos, komo kuando fue el plano de la Komisyon Peel, achetaron, los arabos refuzaron, i atakaron a los djudyos, ke fundaron el estado de Israel a la ida de los inglezes, el 14 de mayo 1948.
Los arabos aprovaron de echar los djudyos a la mar, ama no solo no reusheron, ama a la kontra el territoryo de los djudyos se engrandesyo sovre lo ke les dava el plano.
Mos apiyadaremos un poko sovre este povereto de Amin: nada le reushe.
Se da kuenta ke el rey Abdallah de Transjordaniya, ke teniya una armada fuerte komandada por un jeneral ingles yamado Glubb Pasha, se kedo de si para si una vez ke teniya sus territoryos del plano, la Cisjordaniya, i ke los anekso para azer un reyno sovre las dos partes del Yarden, de tal manera ke el pais no se yamo mas Transjordaniya, sino Jordaniya.
Abdallah fue asasinado en Yerushalayim en julyo 1951, i asigun lo ke meldi en Wikipedia, parese ke fue El Husseini ke dyo el orden a traves el kolonel El Tell.
Amin va despues aprovar de aunir los paizes de Asia i Africa kontra Israel, i avla a la konferensa de Bandoeng en 1955. Obtyene una rezolusyon anti-israelyana, ke sera, komo munchas vezes, el solo punto de akodro de esta konferensa.
Se retira de la vida politika en 1962 sin ser nunka djuzgado por sus krimenes.
Komo lo dishe la semana pasada, muestra sola konsolasyon es ke vido antes de morir ke todos sus esfuersos, todos sus krimenes no aviyan servido de nada a su puevlo. Vido de su egzilo el renasimyento del estado de Israel, vido las viktoryas de Israel en 1948, i, peor, en 1956 i sovre todo en 1967, kon la Palestina araba enteramente okupada por los djudyos, i mismo vido la viktorya de Israel en la gerra de Kipur. No es muncho, ama yene es una konsolasyon de pensar a su dezespero de ver a kada vez los djudyos mas i mas fuertes i los arabos de Palestina mas i mas flakos i malorozos por aver oido sus konsejos.
Al djueves ke vyene, si kyere el Dyo!
Edmond Cohen
Paris – Fransya
