Muestra lingua: EL DJUDEO-ESPANYOL por Edmond Cohen

Keridos amigos, aki toparash el teksto de la emisyon de esta semanada.

El program se puede sintir por Internet kada djueves a las 4 H O6 PM, ora de Paris, indo al sityo  RADIO – la fréquence juive. Kale tener pasensya i asperar un poko, no se oye pishin.

Aki toparesh el teksto de mi emisyon del djueves 29/3/2012

Saludos a todos
Edmond Cohen
Paris, Fransya

 EL DJUDEO-ESPANYOL

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 8 de mayo, de las dos i medya asta las sinko, al muevo adereso del 17 rue Pierre Semard Paris (9°), arriva del Square Montholon, métro Cadet. La entrada es la del lokal i no la del han.

La semana pasada, kale pedronarme si no pude azervos una emisyon en direkto, ama me topava en mi kaza ande teniya de guadrar mi inyetiziko ke ya tuvo sinko anyos, mashalla mashalla…imposivle de venir a la radyo!

Oy me vo atrivir de azer una koza ke nunka dainda ize desde unos kaji syete anyos ke vos avlo a la radyo, keridos oyentes, kyero dizir avlarvos no solo en djudeo-espanyol, ama tambyen del djudeo espanyol. Si no me atrivi de azerlo asta oy, tengo por esto muy buenas razones: no so linguisto, no tengo dingun diplomo de kual ke sea lingua, kuando tenemos el mazal de tener kon mozotros el profesor Sephiha, ke el, kuando avla del ladino o del djudeo-espanyol, save de kualo se trata.

I yene me vo atrivir de dizirvos unas kuantas kozikas sovre muestra lingua, afillu si no la konosko por el klavo i el burako, afillu si no konosko el turko, afillu si konosko muy mal el ebreo, porke no es menester de ser gran savyo para dizirvos lo ke tengo gana de dizir.

La primera koza sovre kualo tengo gana de avlar oy, es sovre lo ke se deve pensar oy sovre la manera de avlar i eskrivir muestra lingua. Me parese ke egzisten oy dos vizyones opozadas de ver muestra lingua:

1°) Primera manera de ver: muestra lingua es el espanyol ke trusheron kon eyos muestros antepasados kuando fueron echados de Espanya i ke toparon refujyo en el Imperyo osmanli. Lo ke avlamos oy deve ser lo mas serka posivle de esta lingua, afillu si ya se save ke se troko i se tomo byervos, no solo ebreos, ama tambyen turkos i otros.

Moïse Franco, en su livro eskrito en 1897, intitolado Histoire des Israélites de l’Empire Ottoman (Istorya de los Djudyos del Imperyo Osmanli) eskriviya (p 39) ke « cette belle langue castillane a fini par devenir aujourd’hui, parmi les Israélites de Turquie, un jargon barbare » (esta ermoza lingua kasteyana eskapo por azerse oy, ande los djudyos de Turkiya, un jargon (lingua mesklada) barbaro).

Esta primera manera de ver es la de los israelyanos de Aki Yerushalaïm komo Moshe Shaul o Zelda Ovadia. De la misma idea es Selim Amado, el ermano de Rachel Bortnick, la kapo i fundadora de Ladinokomunita.

Kale dizir ke para ser entendido por todos los muestros, es vedra ke es mijor de avlar una lingua serka del espanyol. Todos, i sovre todo los Selaniklis, no konosen munchos byervos turkos uzados por los Estambollis.

Asigun los partezanos de esta primera manera de ver, deke, en vez de kozina, byervo espanyol ke todos entyenden, dizir mupak, byervo ke no es mismo turko, syendo ke en turko la kozina se dize mutfak i no mupak?

2°) Yene ay una sigunda manera de ver, i pishin vos dire ke es la miya, mismo si entyendo muy byen la primera manera.

Por esto kale en primero akodrarse de lo ke disho en yidisch, en 1945, el umoristo djudyo Max Weinreich: « A shpracht iz a diyalekt mit an armay un flot »(una lingua es un dialekto kon armada i vapores). El dialekto es la manera de yamar una lingua avlada por djente ke no tyenen el poder. Si lo teniyan, lo ke avlan seriya una lingua. La lingua espanyola es una lingua solo porke ay un estado espanyol . No ay un estado djudeo-espanyol, ama asigun mi muestra lingua djudeo-espanyola no tyene nada de mas basho por esto , de inferyor, a la lingua kasteyana.

En sigundo, lo ke avlan los djudyos echados de Espanya no puede ser la lingua de los espanyoles, syendo ke en 500 anyos, la avla tan de los espanyoles komo de los djudyos se troko de si para si, en dos vandas ke no se konosiyan. Los espanyoles trokaron la prononsyasyon kon la jota (oho i dehar en vez de ojo i deshar), los djudyos metyeron la d antes de la r (vedre en vez de verde), esto solo por dar egzemplos.

En treser, es vedra ke muestra lingua se incho en syertos lugares, en Estambol muncho mas ke en Selanik, de byervos turkos . Ama por esto vamos a dizir ke muestra lingua es un « jargon »? Si tal es, kualo dizir del franses, lingua de orijen seltika, tan mesklada de byervos latinos ke se yama lingua latina, ama ke no tyene por tanto nada de ver kon lo ke avlava Ciceron, ke si biviya dainda i veniya en Fransdya no entendriya ni un byervo de la lingua franseza sözde latina. Yo acheto ke muestra lingua sea yamada jargon si el fransez de Racine i de Victor Hugo es tambyen yamado jargon.

En kuatren, ya se ke ay munchos djudeo-espanyoles ke avlan de la Espanya komo de sus patria. Yo no me syento nada dever ni a la Espanya ni a su lingua. Si devo kualkyer koza, es a los turkos ke mos arresivyeron en tyempos pretos, i a mi no me embarasa si metemos byervos turkos, indimas ebreos, en muestra lingua en vez de syertos byervos espanyoles.

Mi vava diziya kolay i yuch , nunka la oyi dizir fasil o difisil, i si kyero avlar su lingua, la kyero avlar tal i komo la avlava eya, kijo dizir la avlava el puevlo djudyo d’Estambol. Ya se ke azyendo esto, puede ser no vo ser entendido de los selaniklis o de izmirlis ke dizen zor kuando un estambolli dize yuch. Ama ansina es. Aki mismo en Fransya, lo ke se yama en Paris le dédit se dize en Lyon la dédite; el teinturier de Paris es yamado dégraisseur en Lyon. Syempre los de Lyon disheron ansina. Me parese ke kaler respektar la manera de avlar de kada uno…asta un syerto punto.

Para burlarme un poko de lo ke yo mismo vengo de dizir, eskrivi ay unos kuantos anyos una konsejika sözde en espanyol del siglo kinze, en vedra sovre todo en turko, ke intitoli, por shaka naturalmente, « el espanyol del siglo kinze ». La embiyi a Ladinokomunita . Ansina era:

Kada uno save ke el espanyol ke avlamos aki es el espanyol del siglo kinze. Por esto eskrivi una konsejika en esta lingua ke mos plaze tanto.

Un alhad una balabaya kodja boy, bivda de un haham brusali, henoza en su fostan mavi, asentada sovre un minder a la köche de su salon, resive su musafir, un kasap un poko kazikchi, ama de buen kiyafet, ke entrando belledea pichin el kuti de teneke , al lado del mangal, para la sedaka, i ke mete dos groshes.

– Hosh gildin! Buyrun! Ke haber?

– Todo bueno, mersi, afillu si tengo merekiya kon mis ijikos, tan forkatadjis.

– Bereket, bereket, mashalla! I la parnasa?

– Karar…Otro lakirdi! I tu, la salud?

– M’estan endjidando los varsakes, y suluk no tengo, ama ke azer? pasensia! Y a ti ke te afito?

– Mira, hanum, tengo una bela, una mesele kon un dalaveradji de mushteri, ke me kita hohentas.

– Echa’n basho.

– Me merko karne para köftes, agora me dize ke es kösele, lo ke es haliz mintira, y me demanda la para atras. Mora en mi han, kiradji de la treser tabaka. El kapak le kaiga, a este mamzer!

– No avles ansina, i no te sikilees, pasha, kolay sera. Me vo englenear a uydurearte un marafet. Kualo es su echo, a tu bichimsiz?

– Es el bakal al lado de la Kula.

– Merkale leblebis i fustukes, dizele ke son aharyentados y bayat, y demandale la para atras. Te va deshar pishin.

– Ashkulsun por tu buelta de meoyo, ansina vo azer.

– Agora echate kon la pacha larga. Ah, una koza: en indote, me puedes merkar un pishtamal?

– Kon muncho plazer! Kuanto kieres pagar?

– Dozientos liras

– Dozientos liras? Sos shakadjia, he? kon dozientos liras no toparas dingun pishtamal.

-Sigun ti, kuanto kale meter?

-Trezientos a lo manko

-Na trezientos. Ama para este presyo me vas a merkar un ermozo?

– El mas ermozo de los pishtamales .

Se va el kasap, korre ver a su amigo Moshonachi y le demanda: «Kualo es un pishtamal?»

Ansina es kuando no se konose bien la lingua del siglo kinze…

I ansina era mi konsejika.Ya entenditesh ke era en modo de shaka, ama puedesh ver ke mismo yeno de byervos turkos, yene el fondo era espanyol. So siguro ke si algunos de vozotros, keridos oyentes, no entenditesh muy byen mi konsejika, un turko ke la oiriya no la entenderiya tampoko, i esto por munchas razones:

La primera es ke si azej dikat, no ay tantos byervos turkos ke parese, o si ay, son ispanyolizados. Tomaremos la primera fraza de mi teksto:

Un alhad. Un es un byervo espanyol. I alhad? No. Alhad, en espanyol, se dize domingo. Turko? Tampoko. Alhad, en turko, se dize pazar. Ebreo? Tampoko. Alhad, en ebreo, se dize yom rishon. I de ande mos sale este alhad? Del arabo…

Una balabaya. Una es espanyol. I balabaya? Turko? no. Ebreo? Mas o menos… el byervo ebreo, ke es al maskolino, es baal abait, amo de la kaza. Los djudeo-espanyoles, de baal abait, izyeron balabay, i al feminino balabaya, byervo ke ni es espanyol, ni es ebreo: es djudeo-espanyol, i solo djudeo-espanyol.

Kodja boy: dos byervos turkos, ke kyeren dizir muy alta.

Bivda: byervo espanyol, salvo ke en Espanya se eskrive i se pronunsya viuda.

De un: byervos espanyoles. Haham: byervo ebreo. Brusali/ byervo turko, salvo ke los turkos dizen Bursa i bursali.

Henoza: byervo ke empesa en ebreo: hen es la grasya en ebreo, i ke se eskapa por un sufikso espanyol: henoza en vez de grasyoza. De muevo mos topamos en frente de un byervo ke parese espanyol, ama ke no es, sin ser ebreo por lo tanto: es un byervo djudeo-espanyol, i solo djudeo espanyol.

En su: dos byervos espanyoles. Fostan mavi: dos byervos turkos.

Por siguro, un espanyol ke melda o oye: un alhad una balabaya kodja boy, bivda de un haham brusali, henoza en su fostan mavi, no va entender nada, sino, puede ser, ke se esta avlando de una viuda, si entyende ke bivda es viuda. Ama un turko? Ni el tampoko. No puede nada entender kon solo los byervos kodja boy i fostan mavi. Ke aze este fostan mavi kodja boy? I un israelyano? El solo byervo ke va entender es haham.

Mi vava, eya, uvyera todo entendido, salvo puede ser henoza, ke es mas un byervo de Selanik ke de Estambol, ande se diriya grasyoza.

Lo ke kije amostrar, es ke el fakto ke el djudeo-espanyol tyene byervos de munchas orijenes no aze de el un jargon. Es una lingua espesifika ke es a la vez djudiya i espanyola. Syerto ke, afillu todos los byervos turkos ke pueden entrar, su sintaksis, su gramatika kedan espanyolas, lo ke aze la grande diferensya entre el djudeo-espanyol i el ladino, ande la sintaksis, la gramatika, son ebreas afillu si todos los byervos son espanyoles.

De toda manera, los djudyos se toparon ovligados, kuando, una vez en Turkiya, les ayegaron a poko a poko kozas ke no egzistiyan en 1492, de bushkar alrededor de eyos un byervo para estas kozas, komo piron o chadir.

Munchas vezes, tomaron un byervo turko, i lo ispanyolizaron. Tomaron del turko chanak i lo izyeron una chanaka. I los verbos tambyen fueron tomados del turko, i kullanmak se izo kulanear.

Lo kuryozo, asigun mi, no es ke ayga byervos turkos en muestra lingua, lo kuryozo es ke despues de 500 anyos en medyo de los turkos, ay tan pokos…

I a mi me vyene otra koza puede ser mas kuryoza: es ke los djudyos venidos de Espanya, ke oyeron avlar turko delantre de eyos durante 500 anyos, lo ke aze mas o menos 17 jeneransyos, no se ambezaron a pronunsyar komo kale los byervos tomados de los turkos.

Para yamar el karvon, los djudyos estambollis no diziyan karvon, salvo en la ekspresyon preto karvon. Sino lo diziyan en lo ke pensavan ser turko: kömür. Salvo ke en 500 anyos no se ambezaron a pronunsyar ni ö ni ü…I disheron kimur en vez de kömür durante 500 anyos! I kualke sea el byervo turko, syempre se topa bozdeado. Mutfak es pronunsyado mupak. Mushluk es pronunsyado bushluk. Tüfek es pronunsyado tufenk, ihlamur es pronunsyado flamur, djins es pronunsyado djiz, balik es pronunsyado baluk, defter es pronunsyado tefter, ets ets.

En vezes, los djudeo-espanyoles dizen byervos turkos ke los turkos no dizen mas: por egzemplo, kuando los djudyos dizen tulumbadji, los turkos ya konosen este byervo, ama agora dizen itfaiyedji.

Por dizir la vedra, esto troko agora, kon la eskola de la Repuvlika turka. Los djudyos de oy ya saven pronunsyar el turko. Ama mi padre tambyen saviya pronunsyar el turko. Ama lo pronunsyava a la turka kuando avlava en turko, i lo pronunsyava a la djudiya kuando avlava en djudeo-espanyol. Esto mos amostra mijor de todo ke el djudeo-espanyol es un lingua espesifika, ke ni es espanyol, ni es turko, ni es ebreo. El mijor egzemplo es benadamlik, byervo djudeo-espanyol ande no ay nada de espanyol, solo dos byervos ebreos: ben Adam, i un sufikso turko: lik. Es djudeo-espanyol porke solo un djudeo-espanyol uza este byerrvo, deskonosido i de los espanyoles, i de los israelyanos, i de los turkos.

Esto dicho, sin avlar de la haketiya marroki, ay munchos djudeo-espanyoles diferentes. Rachel Bortnick, en el Amaneser de avril ke arresivi djusto ayer myerkoles, mos konta en un artikolo ke una djudiya de los muestros, indose en Meksiko, demanda a una vendedora: « Este fostan no tyene kushak? » El kushak, en turko, es una ancha vita. Ama este byervo vita de ande vyene? No se topa en el Nehama, i por tanto es la sola traduksyon ke den los Perahya a ceinture. Lo ke kyere dizir ke los Selaniklis komo Nehama no konosen la vita i ke los Estambollis komo los Perahya konosen la vita. Kuando los estambollis dizen avikas, los selaniklis dizen fijones.

Agora ya vino el tyempo de eskapar mi emisyon. No se si vos ambezi munchas kozas, porke ya deviyash saverlas, ama yene es bueno de avlar un poko de muestra lingua una vez en syete anyos.

Al djueves ke vyene, si kyere el Dyo!

Edmond Cohen