eSefarad Noticias del Mundo Sefaradi
Keridos amigos, se avla muncho de la Crimea estos diyas.Mi emisyon de djueves va ser sus djudyos, ke tuvo durante unos 2000 anyos, i ke no tyene mas.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos!
Edmond Cohen
Paris, Fransya
DE MUEVO SOVRE LOS DJUDYOS I LA CRIMEA
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez vos akodro ke el proksimo atelye de konversasyon de la asosyasyon Vidas Largas se tendra el martes 29 de avril, de las dos i un kuarto asta las sinko, en el Centre Communautaire, 119 rue Lafayette Paris (10°). Metro Poissonnière o Gare du Nord.
Oy me pensi de avlarvos de los djudeos de Crimea. Es vedra ke ya ize aki mismo, el 12 de fevrero 2011 , una emisyon intitolada Los djudyos de Crimea.; ama en vedra esta emisyon era muy incompleta i vos dishe una parte del kusur en varyas emisyones diferentes, un pedaso aki, un pedaso aya.
Me pensi ke seriya byen de arrekojer estas kozas espartidas en varyas emisyones, i adjuntar lo ke se puede dizir sovre la situasyon de oy, ke troko kon la venida de los Rusos en Crimea.
Para empesar por el empesijo, asigun los istoryanos, se topa djudyos en Crimea desde el primer siglo despues del kristo. Los arkeologos toparon papeles de liberasyon de syervos por djudyos i tambyen lajas de tombas djudiyas.
Lo ke me ambezi sovre internet lo travi de una parte de Wikipedia, de otra parte de la Jewish Encyclopedia.
Parese ke los djudyos aziyan djudyos a sus syervos, i aviya tambyen goyim observando parte de las leyes djudiyas, yamados Sebomenoi.
Pasa el tyempo, la Crimea pasa de los Godos, ke vinyeron en 250, a los Hunes en 316, los Bulgaros en el siglo 5, i ansina es ke verso la mitad del siglo 7, dunke verso los anyos 650, vyenen los Khazares en Crimea. No son djudyos en este tyempo, ama azen konosensya kon el djudaismo vyendo a los djudyos ke biven ayi, i ke son mas i mas numerozos porke vyenen de todas partes de Evropa i del imperyo romano de oryente, ke komo ya lo savemos, persige a los djudyos.
Para vinir atras a los Khazares, venidos verso 650, eyos tyenen a su kapo un kagan, ke es un rey, i un bek, ke es el kapo de las armadas. Las kozas se trokaron agora porke estamos en medyo de las atakas de los arabos muzulmanos, ke destruyeron el imperyo sasanido de los Persos zoroastrianos. Es djustamente en 650 ke los Khazares, rejidos por el kagan Irbis, rezistan a los arabos yevados por Abd ar Rahman ibn Rabiah, i ganan la bataya de Balanjar.
Despues de arrepushar a los arabos, los Khazares konkistan a poko a poko a los paizes a lado de eyos i toman a los Byzantinos la Crimea okupada por Godos, ama ande ya aviya tambyen munchos djudyos.
Los Khazares shamanistos se amostran muy tolerantes en materya de relijyon, i munchos djudyos vyenen de todas partes, sovre todo del imperyo byzantino ke persekuta a los djudyos, para refujyarse ande los Khazares, de tal manera ke los djudyos azen a poko a poko una parte importante de la povlasyon khazar.
El pais khazar se enrikese porke se topa en medyo del kamino de la seda, i los khazares verso 750, en la epoka ande los frankos arrepushan los arabos en Poitiers, toman por mueva kapitala, despues de Balandjar i Samandar, a la sivdad de Itil, al bodre de la mar Kaspyana, ande se echa la Volga. Mozotros dizimos la mar Kaspyana, ama en esta epoka i asta oy en syertas linguas komo el turko, esta mar se yama la mar Khazar.
Se dize ke son los khazares ke fundan la famoza sivdad de Kiev, oy kapitala de la Ukranya.
Ama por siguro, lo ke mos enterese lo mas, a mozotros los djudyos, i djudyos de Turkiya por en sima, es ke, komo ya se save, los Khazares, i por empesar el rey mizmo de los Khazares, se izyeron djudyos verso los anyos 800, epoka ande Charlemagne se aziya emperador en Evropa, i resiviya una orloj komo regalo del khalif de Bagdad Harun al Rashid.
Los Khazares se topavan entre el imperyo bizantino kristyano, i los arabos muzulmanos. No se si es por esta razon ke se izyeron djudyos, ama lo ke es siguro i provado por munchos dokumentos arkeolojikos, es ke se izyeron djudyos. La leyenda konta ke el rey izo vinir a su palasyo un papas un imam i un haham, les demando de avlar de su relijyon i de la de los otros, vido ke la relijyon djudiya era la mas vyeja i respektada i por esto es ke eskojo de azerse djudyo.
I kuando digo azerse djudyo, no lo izo por mitad. Los reyes tomaron nombres djudyos, por egzemplo Joseph o Ovadia, fraguaron kales i eskolas djudiyas, komyeron kasher, izyeron del djudaismo la relijyon del estado, i la lingua ofisyal del pais fue el ebreo i no mas el turko. Por lo tanto kale dizir ke dinguno fue ovligado de azerse djudyo por fuersa, de tal manera ke afillu lo ke dishe todos los Khazares no se izyeron djudyos, i kedaron kristyanos komo muzulmanos en la povlasyon.
El pais Khazar, ke muncho se engrandesyo al punto de aserkarse de lo ke va ser Moskva mas tadre, fue el refujyo djudyo de todos los persekutados de Evropa, i por empesar de los djudyos de toda parte.
Kuando el djudyo Hasday ibn Shaprut, mediko i vizir del Khalif de Cordoba Abder Rahman III, supo ke egzistya muy leshos de Cordoba un reyno djudyo, embiyo en 960 una letra a Joseph, rey de los Khazares, para asigurase ke era todo vedra, i el rey Joseph le arrespondyo ke si. Esta korrespondensya fue publikada por Isaac Akris en su livro Kol Mevasser, en Estambol en 1577. Marek Halter, ke eskrivyo un romanso intitulado El ayre de los Khazares (le vent des khazars), mos dize ke los orijinales de estas letras se topan oy en el Christ Church College de Oxford, en Ingletyerra, ande las vido i meldo. Son eskritas sovre papel, en lashon, tan la letra de Hasday komo la del rey Khazar.
Parese ke este reyno khazar fue una isla de paz, de toleransya i de sivilizasyon en estos tyempos.
Ama las kozas trokan, i lo ke se va pasar es el nasimyento de la Rusiya al norte del reyno Khazar. En 965, los Khazares pyedren la kale (forteresse) de Sarkel, konkistada por el prinsipe rus Svyatoslav, ke toma en 968 a Itil, la kapitala de los Khazares. Es la fin de la independensya de los Khazares, ke van a toparse basho la dominasyon de los Rusos.
Es siguro ke la fin del reyno khazar va ser koza muy negra para los djudyos de Crimea, ke se van a topar basho la dominasyon de puevlos ke no seran todos muy amigos kon los djudyos, afillu si, por lo tanto, unos kuantos no se van amostrar enemigos por prinsipyo de los djudyos. Despues de los Rus van a venir los Pechenegos en 1016, los Kipchaks en 1050, los Polovtsos en 1171, los Venetsianos en 1204, el anyo ande tomaron i destruyeron Estambol, i los Tatares i Mongoles en 1237, los genovezes guadrando unos kuantos puertos.
De 1430 a 1783, los Tatares van a estableser en Crimea un estado independyente, i los djudyos se esparten en dos vandas, los Karaïtos i los Rabanitos. Los Tatares de Crimea yaman a los djudyos rabanitos zulufli chufutlar, los djudyos kon peyes, i los Karaitos zulufsiz chufutlar, los djudyos sin peyes. En turko de Turkiya, el byervo chifut es pejorativo, djudyo se dize yaudi, o, mas shik : musevi. No se si chufut era pejorativo o no ande los Tatares. Ama lo ke es siguro, es ke la lingua ke avlan los Tatares es muy serka del turko de Turkiya, i ke la lingua ke va ser la lingua de los djudyos de Crimea, i ke se va yamar el djudeo-tatar o krimshak, es tambyen muy serka del turko.
Por esto es ke los djudeo-tatares son partikolares : no son ashkenazim, no avlan yiddish, i no son tampoko ni romanyotes ni sefaradim : lo ke avlan es ni grego ni espanyol.
Estos djudyos krimshaks biviyan en varyas sivdades de Crimea, ama sovre todo en una ke se yamava Karasu-bazar asta 1944, i ke se yama agora Bilohirsk. Es oy una sivdadika de 18.000 moradores, entre Simferopol i Feodosia. Una sivdadika vazyada komo las otras de sus djudyos, vamos a ver deke.
Parese ke los djudyos no se topavan tanto mal del tyempo de los tatares. Las kozas trokaron kon la venida de los Rusos ke persigieron los djudyos, i yene munchos djudyos ashkenazim vinyeron a instalarse en Crimea i a poko a poko los djudeo-tatares se izyeron minoritaryos frente a los ashkenazim, al punto ke, en 1900, los Krimshaks djudeo-tatares eran solo 6.000 en Crimea, kontra 60.000 ashkenazim.
I vyene la revolusyon bolchevik de 1917. Los revolusyonaryos kyeren dar a los djudyos de Rusya derechos ke nunka tuvyeron del tyempo de los tsares. En 1919, la Yevsektsia, la Seksyon djudiya del Partido Komunisto, dirijida por un syerto Semion Dimanstein, penso ke seriya bueno ke los djudiyos lavoren en los kampos, idea tambyen de los syonistos, ama los kampos, para los Syonistos, eran en Erets, para la Yevsektsia eran en Unyon Sovyetika. De toda manera, se pensava de dar a los djudyos un territoryo de povlasyon para eyos komo nasyon, ama ande ? Byelorusiya ? Ukranya ? Crimea ? Kavkaz ? En 1923, Abraham Bragin, despues de aver sido syonisto, demanda una rejyon autonoma djudiya, en su idea en Crimea. Yuri Larin pensa lo mismo i se sonya de estableser aya 400.000 djudyos komo agrikultores. En 1924, el governo funda el Komzet, Komite por el establesimyento de los lavoradores djudyos sovre la tyerra, i en 1925, el Ozet, Organizasyon kon el mismo eskopo, kon Yuri Larin a su kavesa. Un djudyo komunisto de esta epoka avla de la Crimea yamandola muestra Palestina… En 1926, el Prezidente del Soviet Mikhail Kalinin , vyene avlar al kongreso de esta Organizasyon para enkorajarla de estableser kazalinos djudyos por « syenes de miles » Ama Stalin no kyere ver los djudyos estableserse en Crimea. Ke los djudyos tengan una tyerra, ama no la Crimea. I la idea de la Crimea es abandonada, komo la de Byelorusiya o la Ukranya. Los nasyonalistos antisemites no kyeren ver a djudyos estableserse ande eyos.
I va ser el Birobidjan, ande pokos djudyos se van a ir; komo puediyan endevinar lo ke iva afitar mas despues kon los Almanes? Si los djudyos se aviyan ido en masa al Birobidjan, estos todos se uvyeran salvado de los Almanes.
Esto dicho, antes de avlar de los Almanes, kale akodrar las matansinas kontra los djudyos del tyempo de la gerra sivil ke sigio la revolusyon rusa, ande munchos siviles, i partikularmente djudyos, fueron masakrados.
I komo no akodrar tambyen el Holodomor, la grande ambre ke, entre 1932 i1933, toko a la povlasyon de Ukranya i ke izo a lo manko 4 milyones de muertos en Ukranya, sino mas. Este Holodomor toko tambyen la Crimea.
Ama por siguro, lo mas terrivle fueron las matansinas por los Almanes i sus einzatzgruppen. Unos 65.000 djudyos biviyan en Crimea a la yegada de los Almanes en 1941. Unos 35.000 pudyeron fuirse mas al este antes de la invazyon. Unos 8.000 eran mobilizados en la Armada Kolorada. Kedaron unos 23.000 poveretos djudyos ke los Almanes bushkaron sin piyadad asta matarlos kaji todos, no por deportasyon, porke no teniyan los trenos ni los kampos para esto, ama por balas o por kamyones de gaz.En la primera mitad del mes de desyembre 1941, los djudyos ashkenazim i los pokos krimshaks empesaron de ser matados en masa, en lo ke se yama agora la shoa por balas. Topi sovre internet las listas sivdad despues de sivdad, diya despues de diya, de la matansina de los djudyos de Crimea en jeneral i de los Krimshaks en partikolar. No tengo la gana de azervos esta meldadura.
Vos konti la semana pasada ke si los Almanes no tokaron a los karaitos de Lituaniya, ke eran de orijen de Crimea, a la kontra no izyeron diferensya verso los karaitos kedados en Crimea, ke fueron matados tal i komo los otros djudyos.
En todo, ke sea karaitos, djudyos ashkenazim o djudyos krimshaks, poko kedaron bivos, unos 1.500 en todo, ke a poko a poko dezaparesyeron eyos tambyen despues de la gerra, desbasho la politika antidjudiya de Staline, ke izo matar el 12 de janvier 1948 el aktor yidisch Solomon Mikhoels. Kon esto empeso una ola de espanto para todos los djudyos, munchos syendo aferrados i echados en prezo. (i, entre patantezas, en el Birobidjan tambyen). El 12 de agosto 1952, en lo ke se yama oy la noche de los poetas asasinados, 13 djudyos inkluendo el eskrivano Peretz Markish fueron egzekutados en el prezo de la Lubyanka. En 1954, despues de la muerte de Staline, Khrouchtchev dyo la Krimea a la Repuvlika sovyetika de Ukranya. Despues de 1990 i de la kaida de la Unyon sovyetika, los pokos djudyos ke kedavan se fueron en Israel.
Vos puediyash pensar, keridos oyentes, ke no se iva mas avlar de djudyos en Crimea. Esto es un yerro. El primo de marso pasado, dunke ay kaji djusto un mes, la puerta i las paredes del kal de Simferopol, kapitala de la Crimea, fueron topadas kon kruzes gamadas i eskrito «muerte a los djudyos». Vide la foto, ama komo no se la diferensya entre el ruso i el ukranyano, no vos puedo dizir ek ke lingua era eskrito. Todo lo ke savemos, es ke agora la Rusiya tomo atras la Crimea ke aviya dado a la Ukranya en 1954.
De toda manera , ke la Crimea sea rusa o ukranyana, es el kavo de 2.000 anyos de prezensya djudiya en Crimea. De este punto de vista, se puede dizir ke los antisemites ganaron. Orozamente ke ay un Estado de Israel para arrekojer a los egzilados.
Agora veo ke ya vino el tyelpo de eskapar mi emisyon, i vos digo al djueves ke vyene, si kyere el Dyo!
Edmond Cohen
