eSefarad Noticias del Mundo Sefaradi
Los selaniklis ke vinyeron para enreziar el porto de Haifa, ke estava kosheando, arkilaron apartamentos en la kaleja Hashomer en Haifa, onde se formo un kartie kon aire (atmosfer) espesial.
Achakes de mankeza de kazas, bivieron dos o tres famiyas en un apartamento, kon amista i relasiones buenas.
El ayre ke aviya en viernes era muy uniko, se sintiya los kantes de las ijikas, ke kantavan en alimpyando i espondjando las kazas, i preparando las kumidas para Shabat. Eran diyas de onor, i alegriyas a segun la tradision sakra de aresivir el shabat.
En la kaleja, fonksyonava un forno (orno) ke se yamava Ahdut (unidad), ke aprontava bastante panes i frandjolas (pan blanko) i halot. Un azniko kon dos kashas yevava los panes a los bakales, deshando en la kaleja golor maraviyoza de pan fresko.
Ke ermozura era ver ijos i ijas kon tasines de borekas o baklavas o maruchinos o kumidas, komo musaka o berendjena, i otras, ama todos markados kon sinyales, ke sepan los ijos a tomarlos atras del horno. aparte de los tasines aviyan los tendjeres de Hamin, ke kada uno konosiya el suyo.
En la kaleja moravan tambien unas kuantas famiyas eshkenaziyas, i eyos mandavan el Chulent (hamin) al orno.
Un viernes, un ijiko ashkenazi tomo atras a su kaza un tendjere de hamin yerrado. en shabat, kumieron i se chuparon los dedos, le disho el ijo a su padre: papa, perdoname, me yerri, i tomi el tendjere de chulent de los selaniklis. Bueno, disho el padre, es bueno ke te yerrates, el hamin suyo es mucho mas savrozo…
Sanos i rezios a todos, i kon amista.
Nissim Ashkenazi
Kiryat Motskin
Israel.
Fuente: Ladinokomunita
