Los SHADARIM: la mueva inisiativa de la Autoridad Nasionala del Ladino i su Kultura

Keridos amigos,

Vos keremos dar haber de una mueva inisiativa de la Autoridad Nasionala del Ladino: el Konsilio de los Shadarim*.

El anyo pasado, muestro Komite Egzekutivo eskojio delegados-voluntarios entre los akademikos, aktivistas, i avlantes de la lingua en varias partes del mundo para reprezentar la ANL frente sus komunidades. Vienen de Turkia, Israel, Los Estados Unidos, Ardjentina, Almanya, Serbia, Grecha, Kroasia, Makedonia, Bosnia, i Slovenia. Dechidimos nombrar al profesor Bryan Kirschen de Nu York prezidente (Shadar-Bashi) del Konsilio.

Por agora, los miembros de los Shadarim son: Rachel Bortnick, Liliana Benveniste, Marcelo Benveniste, Michael Schtudemund-Halévy, Bryan Kirschen, Devin Naar, Berta Romano, Karen Gerson Sarhon, Katja Smid, Jagoda Vecerina, Ivana Vucina.

Avagar avagar va kreser el grupo i muestros butos. Entremientes, Bryan vos va eskrivir kon mas detalios.

*Para dezinyar a los dichos delegados-voluntarios, dechidimos de uzar el onorifiko antiguo de SHaDaR, kuya abreviasion tradisionalmente se meldava komo Shaliah De Rabanan (emisario de los rabinos de Eres Yisrael), i el kual en muestro kavzo sinyifikara: Shaliah De la Reshut (emisario de la Autoridad). 

Kordialmente, ​

Tina Rute Cediel | טינה רות זדיאל
Komunikasion i Relasiones Publikas | תקשורת ויחסי ציבור

Autoridad Nasionala del Ladino i su Kultura | הרשות הלאומית לתרבות הלאדינו
 Bet haDfus 11, Jerusalem 95483, Israel |