eSefarad Noticias del Mundo Sefaradi
Keridos amigos i amigas
En el Jewish News de esta semana tenemos el artikolo tratando de Israel ke es un pais kaji sin rekursos.I por tanto en la Biblia se dize ke es un pais de Miel i de Leche kon una abundansia de frutas.Yossi Aron prezento este artikolo.
Saludes a todos
——————————————————————————-
LOS REKURSOS DE ISRAEL
Israel es prove en siertos perspektivos. Pero la Tora no esta de mizmo avizo.
En los anyos ke estudiava en la universidad tuvimos un debate i fue dicho: Moshe tenia ke tornarse a la derecha en lugar de la iskierda. Pero Moshe Rabeinu preparo a Bene Yisrael para traversar a la Tierra Prometida i se fueron iskierda. Esta tierra no tenia petrolio ni rekursos naturales.
Si eyos avian tomado el otro kamino se toparían en paises rikos en petrolio. En el tiempo no avia kestión de esto. Se estavan indo a la Tierra de los Patriarkas komo fue prometido 430 anyos antes en BRIT BEN haBETARIM».
La Perasha de esta semana, EKEV, dize otra koza. «El Dio vos trae a una tierra buena de rios i agua ke viene de las montanyas i las vayes. Una tierra de trigo i de sevada, i de vides, i de ihgeras i de granadas/mangranas. Una tierra ke sus piedras son fierro, i de los montes kortaras kovre».
Ay ke ver esto del punto de vista de una sosiedad agríkola. Todo esto fue dicho a la primera djeneración retirada de la esklavedad en Ejipto. Todas sus vidas no avian visto otra koza ke el dezierto. Pero la agua en la Tierra Prometida no dependía del Rio del Nile. Tenian siete produktos, frutas i granos ke eran nativos de esta tierra. Se plateavan kada anyo. La referensia del fierro es problemátika porke no ay en Israel depozitos de fierro. Puedia ser bazalto viniendo del norte ke un kuarto es fierro. Esto tiene una valor. Oy mizmo se topan kazas en Teveria ke son echas de bazalto preto.
Oy en Israel tienen una otra vista de los rekursos. La agrikultura aparese menos importante en la ekonomía. Se tornan mas a los minerales komo el magnesium, i el gas. Lo ke no troka es la nesesidad de la agua. La luvia depende de la manera ke mos komportamos, komo es dicho en la SHEMA. Mimo kon la desalinizasion, el aumento de la poblasión i kon las temporadas sekas i el kambio del klima, tenemos menester mas de lo ke tenemos. Se dize ke es una tierra de rios i de agua i ke ay ke irse mas profundo. Puede aver agua debasho de la tierra. Kon el espirito de maximizar el benefisio se deve servirse de todos los rekursos i no gastarlos en vano.
Trezladado por Shimon Geron.
Australia
Fuente: Ladinokomunita
