eSefarad Noticias del Mundo Sefaradi
Keridos amigos i amigas,
En el Jewish News de esta semana el artikolo de «Isaac Tesler i Tamar Hayardeni» mos amostra komo era Jerusalem en el pasado. El archivo Cinematheque de Jerusalem esta dijitalizado i unos trezoros fueron deskuvridos, komo la Sivdad Antigua era en los anyos 1930. Ay una meskla del YISHUV Viejo de Judios al lado de los Musulmanes i Kristianos en los sitios santos. Es un Jerusalem ke esta jenerasión no vido antes. La famiya «Migolis» estava en vakansas i el filmo era de kolor. Un dokumentario muy raro de la Sivdad Antigua de Jerusalem kon sus kayes estrechas. Se veia la Universidad Hebrea del Monte Scopus i sovre todo el Kotel Ha Maaravi. Un kamino chiko separava el Kartier Marrokano ke fue destruido en la Gerra de 6 Dias.
Este material tan presiozo fue transferado al Archivo Cinematheque Digitalisado i era aksesible al publiko.
Saludes a todos.
——————————————————————————-
UN JERUSALEM DEL PASADO
The Western Wall, long before today’s plaza even existed (Photo: Jerusalem Cinematheque archive)
Las fotos amostran a los Judios Haredim del Yishuv Viejo, a los Musulmanes en sus vestidos tradisionales, las mujeres kon chapeos ornamentales, a los gameyos i los asnos.
Se ven a los mendigos en los kantones de las kayes i el poko de automobiles ke apartienen a los ke lavoran en postos administrativos. En el Kotel avia siempre mendigos. En el livro de proverbios esta eskrito «La justisia mos salva de la muerte. La bienfezensia forma parte de la orasion» La djente rogava por los Judios ke bivian en la Diaspora i ke eran proves i hazinos. Despues de la orasion davan limozna a los mendigos serka del Kotel. Avia un numero mas alto de Judios en la kapital al empesijo del Siglo 20. Segun el sensus Britanniko en 1922 habitavan 31.100 Judios, 14,700 Kristianos i solamente 13.400 Musulmanes. En 1931 tenian 53.800 Judios,19.300 Kristianos i 19.900 Musulmanes sin kontar los kartieres afuera de la sivdad.
En el dijital se ve a los Ashkenazim metiendo un chapeo redondo de Kaftan. Para entender porke el Judio Ashkenazi se vestia en un kostum Sefaradi, ay ke ir atras a 1700 el anyo kuando Rabbi Yehudah Ha Hassid vino a la sivdad kon 300 famiyas de imigrantes. El rabbi se murio poko despues pero avia reushido a merkar tierras para konstruir una sinagoga Ashkenazi. Oy se topa ayi la HURVA en ruina. Pero kuando se murio desho devdas a los kontraktores Arabos. Ansi los Ashkenazim no tuvieron el derecho de bivir en Jerusalem por mas de 100 anyos. En el Siglo 19 unos estudiantes Ashkenazim de Vilna Gaon vinieron a Jerusalem i para ke no los konoskan se vistieron komo los Sefaradim. No fue asta 1836 ke kon el ayudo del Dirijente Ejipsiano «Mohammed Ali» en kontrol de la Tierra Santa entre 1832-1840 ke el Rabbi ‘Avraham Shlomo Zalman Zoref» pudo pagar la devda para ke bivan en Jerusalem. En mismo tiempo pudieron fuir de Tsfat ke un terremoto destruyo la sivdad. en i Enero 1837.
La dijitalizasion empeso 3 anyos antes i sera terminada en un anyo. Grasias a esto se va ver miles de imájenes ke fueron olvidados de la istoria de la sivdad.
The Diskin Orphanage, Givat Shaul (Photo: Jerusalem Cinematheque archive)
The Russian Compound (Photo: Jerusalem Cinematheque archive)
Jaffa Gate (Photo: Jerusalem Cinematheque archive)
Outside Jaffa Gate (Photo: Jerusalem Cinematheque archive)
Trezladado por Shimon Geron.
Sydney, Australia
Fuente: Ladinokomunita
