LIVROS NUEVOS. [SHELF IMPROVEMENT] trezladado al ladino por Simon Geron

Keridos amigos i amigas

——————————————————————————-

LIVROS NUEVOS

CODE NAME SUZETTE [Anne Nelson]

Es una istoria del Olokosto ke nunka fue kontada. Istoria de koraje delantre lo ke es malo. «Suzanne Spark» nasida en una famiya Katólika rika se topa kasada en la Dinastía Politika. Su kuniado es Ministro de Asuntos Extranjeros i el marido es «Claude» un eskrivano i patron del pintor ‘Rene Magritte». En la sivdad de Paris okupada por los Nazis, se topa entre los Elites Kulturales. Sus vizinos son «Colette i Jean Cocteau». Kon la Segunda Gerra Mundial Suzanne empesó a bivir una Doble Vida. Tiene amistad kon un Judio Polako refujiado ke la izo entrar en la Resistensia Fransesa. Se sirve de su fortuna i estatuo sosial para tener unos aliados entre los rikos de Paris i los de la iglesia. Basho los ojos de la Gestapo, kon mujeres Judías i grupos Kristianos kidnappan a sienes de kriaturas Judias para salvarlas de la muerte.

THE FUTURE IS HISTORY/ KOMO EL TOTALITARIANISMO REKLAMA LA RUSIA? [Masha Gessen]

La jurnalista konta la istoria del «Post Union Sovietico» kon las istorias de 7 personas. 4 son protagonistas nasiendo en la ultima dékada del Union Sovietiko i engrandesiendo en un tiempo kaotiko de la transformasión. 3 son intelektuales ke luchan para tener una buena reushita en sus disiplinas, solamente para deskuvrir ke lavoran i biven en un vakuum/vazio intellkctual. El Rejime puede derrokar todo a estas 7 personas en la gerra ke están angajados. Al fin re-emerjia el Orden del Viejo Soviet en la forma ke se topa oy. Nasido en una Famiya Judía en la Era Soviet Rusia, Gessen imigra a los Estados Unidos kon sus parientes komo chiko en los anyos 1980 i se torna atrás a Rusia en los anyos 1990 komo jurnalisto i aktivista. Despues se torna de nuevo atrás a los Estados Unidos.

LIBRARIAN IN AUSCHWITZ [Antonio Iturbe]

Es una istoria verdadera de «Dita Kraus», ija de 14 anyos metida en prision kon sus parientes en un Kampo de Famiya en Auschwitz. Novelista i jurnalista «Antonio Iturbe» eze investigasiones i entrevistas kon los sovrebivientes para kontar la istoria de Dita. Kuando el Lider Judio «Freddy Hirsch» organiza una klasa basho la nariz de los Nazis le demanda a Dita de tomar karga de 8 livros presiosos yevados a través las guardias. Dita aksepta i se aze librerania de Auschwitz malgrado el peligro de muerte. Enfrenta a «D. ,Mengele» ke se sierve de eya en sus experimentos groteskos. Dita i Freddy utilizan la edukasión komo forma de rebellion ke les da esperanza de sovrebivir.

1947:WHEN NOW BEGINS [Elizabeth Asbrink]

Kuando el mundo empesa a rekuperar de la Segunda Gerra Mundial, milliones están bushkando una kasa nueva en Europa. Entran en la istoria los parientes del autor Sueduazo «Elizabeth Asbrink». Se pasa en 1947 el anio kuando «Christian Dior» krea el «New Look», «Simone de Beauvoir»eskrive el livro «Second Sex» i kuando CIA topa el «computer bug». Este livro mostra el mundo ke se konose oy. Son las fuerzas ke van a governar a nuestras vidas en los próximos 70 anyos.

THE BOY MADE OF SNOW [Chloe Mayer]

En una aldea Inglesa en 1944 «Annabel» i su ijo «Daniel» biven en la solombra de la gerra. Su marido esta afuera gerreando i eya se siente asolada.Pierde su konsiensia de la realidad. Kuando madre i ijo forman una amistad kon «Hans» un prisoniero Aleman metido a lavorar en la ferma, subito sus vidas se inchen kon sekretos. Para Annabel, Hans es uno ke le aze avrir los ojos de la oskuridad desde el día ke nasio Daniel. Para el ijo solitario subito se avre un mundo májiko de kuentos de fadas/fairy tales. Hans es el prinsipe deguizado ke tiene sus planos i ke pensa de egzekutarlos kon konsekuensias graves. La eskrivana mostra komo es difísil ser normal.

Trezladado por Simon Geron
Sydney

Fuente: Ladinokomunita