eSefarad Noticias del Mundo Sefaradi
Keridos amigos i amigas
En el Daily Telegraph del 12 de agosto avia un artikulo presentado por «Troy Lennon» tratando de la luna ke se esta viendo agora en su estado mas grande i briyante. Es un fenomeno ke se pasa 2 vezes al anio kuando la luna se aserka mas de la tierra.Se kontan muchas istorias i leyendas sovre la luna desde la antikuedad. Vos presento unas kuantas.
Saludes a todos.
LA»SUPER LUNA»
Desde la noche de Alhad la djente a traves el mundo toparon la luna muncho mas grande de lo ke se ve normalmente.Se estima ke era 7% mas grande.En mismo tiempo la luna aklarava las sivdades komo si era en medio del dia.La manera ke la luna aze su sirkulo alrededor de la tierra,2 vezes al anio se aserka mas de la tierra.En estos tiempos la djente lo remarkan porke les viene mas diffisil poder dormir kon tanta luz afuera.Asi es ke la yaman»Super Luna».
Muncho tiempo antes ke se invento el teleskop,la djente en la antikuedad estavan kontando istorias eksplikando komo la luna avia salido,lo ke era la luna i porke estava ayi.En munchas kulturas la luna era femenina.El sol era maskulino. La razon detras puedia ser ke el siklo de la Luna era igual al siklo de la Mujer. avian unas kulturas ansianas ande la mujer era assosiada kon la Majia Eskura.Las mujeres segun eyos tenian una assosiasion kon los espirituos ke aparesian la noche.Kuando la luna estava yena era el tiempo para performar siertos rituales majikos.
avia la kreensia tambien en la antikuedad ke la luna tenia un poder sovre los elementos irrasionales de la umanidad. Esto venia de los animales ke se komportavan de una manera estrania kuando salia la luna.La palavra»LUNATIC»viene de la personafikasion de la luna.Esto no era tan malo siempre.Se referia a amar komo un loko.Por esta razon la luna se assosia kon el romanze.Las manchas pretas en la luna eran imajenes de djente i animales.
La Praktika de La Luna De Miel era una kosa ke se azia un mez despues del kasamiento en una seremonia ande se preparava una bevida del miel fermentado.
Segun lo ke kontavan los de Maya,la luna i el sol fueron kreados en una kompetision sovre la intensidad de la luz.Los Dios echaron un konejo/tavsan en la kara de la luna i de esta manera se krearon las partes eskuras ayi.
Segun la leyenda de China el konejo se metio en la luna despues del akto de karidad serviendo komo un kompaniero a la Diosesa Luna.
Los Ejipsianos Ansianos assosiavan a la luna kon el Dio Khonsu ke era el ijo de Amon-Ra, ijo del Dio Sol i Mut, la Diosesa del Sielo.Kon un disko de plata en su kavesa Khonsu se alevantava la noche para echar afuera a los espirituos malos.Despues el fue assosiado kon Thoth el Dio de Saviduria i Eskrituria. Kon su luz en la eskuridad esto representava un metafor de traier luz al ignorante. A Throth lo mostravan komo un Baboon/Maymun kon la luna en su espalda.
La Luna Grega,se konosia komo Artemis o Selene ke tenia dominion sovre los animales salvajes i sovre la virjinidad en nasimiento. Artemis era la ija de Zeus i de Leto la Diosesa.Tenia un ermano buchuk/gemelo ke era Apollo el Dio del Sol i eya korria detras de el en el sielo.La veian siempre kom una kasadora.
Al orijin la Diosesa Romana Diana era tambien una ke kasava i tenia los mismos atributos ke Artemis.Eya se izo la Diosesa de la luna.Era una ke protejia a la Klase Basha i a los Esklavos.Los Romanos selebravan el 13 Augusto en una Fiesta ke se yamava ARICIA dedikada a eya i en este dia los esklavos resivian un tiempo libre.
La ekspresion»La Luna es echa de kezo vedre/green cheese»refera a la istoria de uno ke vido la refleksion de la luna en la agua i ke penso ke era kezo.Komo el kezo no era maduro no se puedia komerlo.
[El Green Cheese ke lo yaman Danish Blue es tan karo aki ke el solo tiempo kuando puedo merkarlo es kuando viajo en Europa.Todos los kezos ke vienen de afuera i ke son mas delisiosos,son un lukso.Komo desian en la Turkia,uno se mantiene de Sogan Ekmek/Sevoya i pan» o Peynir Ekmek/Pan i kezo.» Mismo esto se izo karo.Otra ekspression ke me gusta es»Man does not live on bread alone/El ombre no bive del pan solamente».]
Tradusido por Shimon Geron, Sydney
Fuente: Ladinokomunita
