eSefarad Noticias del Mundo Sefaradi
Kada martes, Matilda Koen Sarano mos konta sovre kuentos, muzika i otras kozas de su eskritura.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Yakovo el bovo
Yakoviko era un pokitiko bovo i todos en el kazal lo tomavan a la burla. Lo mandavan a ver si en el río avía agua, si en el kazal de al lado kaía luvia i munchas otras kozas ke azían riyir a todos. A la fin le metieron enriva la meza una chika moneda de un grosh i una grande de medio grosh, i le dieron a deskojer ke moneda kería.
Yakoviko tomó la mas grande i todos disheron: «Bovo ijo de otro, él tomó la mas grande sin saver ke vale la metad. Este no se va ambezar nunka».
Al otro día tornaron a mandarlo a kontar kuantas piernas tienen las vakas i kuantas tienen las gayinas.
El les respondió: «Todas las vakas tienen kuatro i las gayinas tienen dos».
«Muy bien!» disheron todos i otra vez le metieron sovre la meza las dos monedas i él tomó la mas grande.
Todos a la una se metieron a riyir i kaje kada día lo mandavan a otro lugar i tornavan a meterle las dos monedas, asta ke uno de los ke riían se apiadó de él i le disho: «No estás entendiendo ke la moneda mas grande vale la metad de la chika?»
I él le respondió: «Sí ke lo sé, ma si tomo la mas chika ke vale el doble, eyos van a deshar de riyir i yo no v’a tener ni la chika ni la grande…»
Kontado por MARIO SORIANO – 2012
Redaktado por Matilda Koén-Sarano
