eSefarad Noticias del Mundo Sefaradi
Kada martes, Matilda Koen Sarano mos konta sovre kuentos, muzika i otras kozas de su eskritura.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Un kuento del Midrásh
El shabat i la vaka
Un djudió tinía una vaka ke lavorava en su kampo.
Un día él pedrió dinero i tuvo de vender el kampo i la vaka.
La vaka la vendió a un no-djudió i éste la izo lavorar la semana entera.
Kuando vino shabat él la tomó para yevarla a lavorar, ma la vaka se empuntó i no kijo menearse.
El patrón la aharvó i la firió, ma la vaka no se meneó.
El no-djudió fue ande el djudió i le disho: «Toma atrás tu vaka. Eya lavoró muy bien semana entera, ma oy en dinguna manera no kere lavorar.»
El djudió entendió ke la vaka estava ambezada a no lavorar i a repozar en shabat.
Fue ande la vaka i le disho a la oreja: «Vaka, vaka, kuando estavas ande mí repozavas en shabat. Agora tienes un patrón de otra nasión, i kale ke agas lo ke kere él.»
De vista la vaka se alevantó i se fue a lavorar.
Muy maraviyado, le disho el no-djudió al djudió: «Kualo le dishites a la oreja a la vaka? Le izites ichizos?»
Le disho el djudió: » Ansina i ansina le dishi a la vaka…»
Se estremesió el no-djudió i se disho: ‘Si una beemá rekonosió a su Kriador, yo ke se ombre, kriado por El a su imajen i semejansa no lo devo rekonoser?’
El no-djudió se konvertió al djudaízmo, fue a estudiar la Ley djudía, se izo rabino i se yamó Rabí Yohanán Ben Torta.
Del Midrásh, kontado por Matilda Koén-Sarano, 2012
