Las Notas de Matilda – Sientistas djudiós: SIGMUND FREUD

Kada martes, Matilda Koen Sarano mos konta sovre los Sientistas djudiós..
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

SIGMUND FREUD
(Pribor Moravia, 1856 – Londra, 1939)
De Wikipedia

 Sigmund Freud , ke se yamava Sigmund Shlomo Freud, nasio en Pribor, ke se topava akel tiempo en en Imperio Austro-Ungariko. El era el primer ijo del treser matrimonio de su padre, primodjento de sus ocho kriaturas. Sus djenitores, viendo su entelijensa prekos, izieron munchos sakrifisios para darle una buena edukasion, malgrado sus provedad. A kavza de la kriza ekonomika del 1857, el padre de Freud pedrio su lavoro, i la famiya se t ransfero a Leipzig antes de estableserse en Viena. En el 1865 Sigmund entro en un prominente liseo de ande salio en el 1873 kon un bakaloreato kon mension. Freud se enskrivio a la fakultad de medisina de la Universidad de Viena, para estudiar debasho el Prof. Karl Claus, ke era darwinista. Despues ke el kurso le kavzo una sensasion de inutilidad i de frustrasion, Freud troko fakultad i estudio en la mizma Universidad debasho el fiziolojista alman Ernst Wilhelm von Brucke, i adopto su fiziolojia dinamika, de la kuala el  partio para arivar a la relasion entre la miente i el inkonsio. En el 1879 Freud interrumpio sus estudios para azer sus servisio ovligatorio de un anyo en la armada. En el 1881 el resivio su doktorado. El el 1885 el arivo a Paris i se metio a lavorar kon el mas renomado neurolojista de Evropa: Jean Martin Charcot, ke era spesializado en el estudio del isterizmo i su kura kon el ipnotizmo. Freud se alesho del ipnotizmo komo kura potensial, i favorizo la asosiasion libre i la analiza del esuenyo. Antes de avrir su klinika, Freud se kazo en el 1886 kon Martha Bernays, la ija del gran rabino de Hamburgo.

El empeso a kurar sus pasientes kon el sistema  de la konversasion, para kitar afuera todo lo ke estava reprimido en sus inkonsio.  Esta forma de kura parese ser la baza de la psikoanaliza. Kuando tuvo 40 anyos Freud empeso a azer su analiza personal, i deskuvrio su ostilidad latente kontra su padre i su atraksion seksual por su madre durante su chikes. Freud yamo esto el «Komplekso de Edipus», i lo apliko a toda su teoria psikoanalitika.  Antes de la publikasion de sus livros en el 1900 i 1902, el entereso por sus teorias empeso a kreser, i ansi el sirkolo de sus sostenidores, mientres ke de otra parte avia ken estava kontrario a sus ideas, komo Carl Jung, ke en prinsipio segio sus ideas, ma despues se topo en konflikto kon el, a kavza de su relijiozidad i mistisizmo, mientres ke Freud era ateo. En el 1930 el resivio el Premio Goete, ma tres anyos despues, kon la suvida del nazizmo al governo, sus ovras fueron kemadas. En el 1938 Freud i sus famiya resivieron una vijita de la Gestapo en Viena, i esto fue lo ke lo izo dechizar de transferarse a Londra. Freud era un fuerte fumador de sigarros i paso mas de 30 operasion a la boka,  a kavza de un kanser oral. No podiendo mas suportar la dolor Freud se suisido en el 1939, kon la asistensia de su doktor, Max Shurl. Tres dias despues su kuerpo fue kremado i inumado en el Sigmund Freud Memorial en Hamptead,  ande esta toda su famiya. Para avlar del inkonsio, de la psikoterapia, del uzo ke el azia de la kokaina en el linimento de la dolor, es nesesario profundizar sus teorias.

Matilda Koen-Sarano