Las Notas de Matilda – Sientistas djudiós: RITA LEVI-MONTALCINI

Kada martes, Matilda Koen Sarano mos konta sovre los Sientistas djudiós..
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

RITA LEVI-MONTALCINI
Torino, Italia, 1909
De Wikipedia – Internet

Rita Levi-Montalcini nasio en Torino en una famita djudia sefaradia, i endjuntos a su djemela Paola era la mas djoven de 4 kriaturas. Su padre, Adamo Levi era un enjenier muy dotado, i era matematiko tambien. Su madre, Adele Montalcini era una pintora yena de talento. Rita Levi-Montalcini fue en el 1930 a estudiar medisina en la eskola medikal de Torino, debasho de Giuseppe Levi, se graduo en el 1936 i  lavoro komo asistente de Levi asta el 1938. Ma su kariera akdemika fue enterrumpida por el «Manifesto de la Razza», i su konsekuente entroduksion de las leyes ke empidian a los djudios las karrieras akademikas i profesionales. Durante la Sigunda Gerra Mondial, eya izo eksperimentos en un laboratorio  montado en su kaza, estudiando el inyervo del kresimiento en embriones de poyos. Su primer laboratorio de djenetika estava en su kamareta de echar. En el 1943 su famiya se transfero a Firenze, i aya eya se formo un laboratorio. Aya eya estuvo en kontakto kon algunos keridos amigos, i korajozos  partizanos del «Partito d`Azione».

Kuando los almanes desharon Firenze, eya fue asinyada a un kampo de refujiados de gerra, ke vinieron del nord a Firenze, i divizo kon eyos sus sufriensas i el perikolo kotidiano de muerte, siendo ke estavan afektos de malatias enfektivas i del tifo abdominal. En el 1945 su famiya torno a Torino. En el septembre del 1946 eya aksepto la envitasion de lavorar en la Universidad de Washigton en St. Louis, debasho la supervizion del profesor Viktor Hamburger. Aun ke la envitasion era para un solo semestre, eya kedo aya por 30 anyos. Es aya ke eya izo su mas emportante deskuvierta en el 1952, de la  izolasion del inyervo NGF, observando  un muy rapido kresimiento de los inyervos de las selulas de siertos tishidos kanserozos. En el 1958 eya se izo profesora, i en el 1962 establesio una envestigasion en Roma, divizando el resto de su tiempo entre Roma i St. Luois. Del 1961 al 1969 eya dirijo el » Centro di Ricerca di Neurobiologia» en Roma, i del 1969 al 1978 el Laboratorio de Biolojia Selular.

En el 1968 eya fue la diezena mujer elekta a la Nasional Akademia de las Siensias de Estados Unidos.  En el 1983 resivio kon su kolega Stanley Cohen el Premio Louisa Gross Horwitz de la Columbia University.  I en el 1986 endjuntos a su kolega Stanley Cohen resivio el Premio Nobel en fiziolojia i medisina por su deskuvierta del inyervo faktor de kresimiento (NGF).  En el 1987 resivio la «National Medal of Sience», ke es la mas alta onor en el mundo sientifiko en Amerika. Eya es oy la mas ansiana biviente de los laureatos del Premio Nobel.

En el 2001 eya fue nominada senator a vida por el Prezidente de la Republika Italiana Carlo Azeglio Ciampi, ande no le mankaron polemikas de la ekstrema derecha, por su apoyo a la siedra, por su edad i por sus orijines djudias.  En el 2008 resivio el PHD ad honorem por la Universidad Complutense de Madrid en Espanya.

Matilda Koen-Sarano