eSefarad Noticias del Mundo Sefaradi
Kada martes, Matilda Koen Sarano mos konta sovre los Sientistas djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
HAIM WEIZMANN
(Motol o Motyli, oy Bielorusia, 1874 – Rehovot, 1952)
De Israel and Zionism
Department for Jewish Zionist Education
The Jewish Agency for Israel
Haim Azriel Weizmann nasio en el Imperio Ruso en el 1874, fue un lider sionista, fue Prezidente de la Organizasion Sionistika Mondial, i Primer Prezidente del Estado de Israel. El fue elijido en el 1949, i tuvo la karga asta su muerte en el 1952. Weizmann era ademas el shimista ke dezvelopo un muevo proseso de produksion de la aseton. El fondo el Instituto Weizmann de Sensias en Rehovot.
El era el ijo de un merkante ke tenia 15 kriaturas, i fue mandado al Heder. A la edad de 11 anyos entro en el liseo de Pinsk, i despues fue a estudiar shimiya en el Politecnico de Darmstaaat en Almania i en la Universidad de Freiburg en Suisa, ande en el 1899 resivio el doktorado kon mension. En el 1901 fue nominado asistente konferensier en la Universidad de Geneva, i en el 1904 senior konferensier en la Universidad de Manchester. Sus pasos en el mundo del Sionizmo empesaron en su djoven edad, i del sigundo Kongreso Sionistiko el se izo una figura prominenet en el Movimiento Sionistiko. En el 1903 al Sejen Kongreso el voto kontra el «Uganda Scheme». En el ochen Kongreso su pozision de «Synthetic Zionism» fue adoptada. Durante la Primera Gerra Mondial tuvieron lugar su momentos mas emportantes, en los kualos el ayudo a los inglezes, dezvelopando la manifaktura del aseton, ke servia en los esforsos belikos. En el mizmo tiempo el estava empenyado en el fronte diplomatiko para la kauza de los djudios, i sus esforsos kulminaron kon la Deklarasion Balfour, en el 2.11.1917.
En el 1918 el arivo a Palestina, komo shefe de la Komision Sionistika, para estudiar la kondisiones aki, i azer rekomendasiones a las autoridades britanikas, i se enkontro en Akaba kon el Emir Feisal, lider del nasionalizmo arabo, para el dezvelopamiento del lavoro djudio en Palestina. Durante este tiempo el sostuvo la fondasion de la Universidad Ebrea de Yerushalayim, a la aviertura de la kuala partisipo en el 1925. En la Konferensia de Londra en el 1920 fue elekto prezidente del WZO i mantuvo esta karga kon la prezidensia de la Ajensia Djudia del 1929 al 1931, i del 1935 al 1946. En el 1930 el dio sus demisiones i torno solo kuando resivio una letra del Primer Ministro ingles MacDonald, ande renovava el akometimiento de la Gran Bretanya a un Estado Nasional Djudio. En el 1931 no fue re-elekto, i en los proksimos 4 anyos dediko sus enerjias a su lavoro sientifiko, kontinuando su aktividad sionistika. En el 1935 el torno a su karga de prezidente del WZO, i en el 1936 prezento la kavza sionistika a la Komision Peel. En el 1939 atako fuertemente el «White Paper». Durante la Sigunda Gerra Mondial Weizmann izo presiones sovre el governo britaniko, para organizar una fuersa djudia kombatiente (La Brigada Djudia), i se fue a USA para ayudar a la preparasion de la kurdela sintetika. Entremientres el kontinuo a ser el prensipal reprezentante de la kavza nasional djudia , i en el 1947aparesio delantre del Komite Spesial para la Palestina en las Nasiones Unidas. A la fin del mizmo anyo izo un inolvidable apelo en la Asamblea Jeneral, en New York. El obtuvo dos kozas emportantes: la inkluzion del Negev en el plano de la Nasiones Unidas por un Estado Djudio, i el rekonosimiento de Israel por los Estados Unidos. Elekto en el 1948 komo prezidente del Konsilyo Provizorio, en el 1949 el se izo el Prezidente del Estado de Israel. Haim Weizmann murio en el 1952 en Rehovot despues de una grave malatia. Le surbivieron su mujer Vera i su ijo Binyamin. Su ijo mas djoven Michael, kayo en el ayre durante la Sigunda Gerra Mondial.
La tomba de Haim Weizmann se topa, sigun su voluntad, en la guerta de su kaza en Rehovot.
Matilda Koen-Sarano
