eSefarad Noticias del Mundo Sefaradi
Kada martes, Matilda Koen Sarano mos konta sovre los Sientistas djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
BRUNO BETTELHEIM
(Austria, Viena 1903 – Chicago, U.S.A. 1990)
De Wikipedia
Bruno Bettelheim nasio en Viena en el 1903 i era djudio por nasimiento, ma su famiya no era relijioza. El fue una figura konosida enternasionalmente, prominente por sus estudios sovre el autizmo i el suskseso en el tratamiento de los desturbos emosionales de las kriaturas. El estudiava en la universidad de Viena, kuando su padre murio. El tuvo de deshar los estudios akademikos para tomar kura de los echos de su famiya. Bettelheim i su primera mujer Gina tuvieron en sus kaza por siete anyos una ijika amerikana, de nombre Patsy, ke mas tadre sera deskrivida komo autista. Kuando kumplio sus devuares enverso de su famiya, el torno a la Univesidad de Viena a estudiar arte. En akel tiempo (1938) en Viena no era posible estudiar istoria de la arte sin estudiar los prinsipales aspektos de la psikolojia . Kuando suvieron los nazistas al governo, el fue deportado kon otros djudios de Austria a Dachau i Buchenwald entre el 1938-1939. Komo rezultado de una amnistia el fue liberado, koza ke le salvo la vida. El uzo su eksperiensa en los kampos de konsentrasion, en su futuro lavoro. Bettelheim arivo a New York en el 1939 para adjuntarse a su mujer Gina, ke ya avia imigrado a la Amerika, ma eyos divorsiaron, i el se transfero a Chicago, i en el 1944 fue naturalizado amerikano i se kazo de muevo.
El fue nominado profesor de psikolojia en la Universidad de Chicago, ande tuvo la karga del 1944 al 1973. El sirvio ademas komo direktor de la «Uiversity of Chicago`s Sonia Shaknman Orthogenic School», ande se tratava de los desturbos emosionales de las kriaturas. El troko esto i kreo un ambiente de terapia, ande las kriaturas pudian krear un fuerte atadijo kon los adultos sin un ambiente strukturado. El tuvo un sukseso konsiderable en el tratar algunos de los desturbos emosionales de las kriaturas. Eskrivio livros sovre la psikolojia de las kriaturas normales i anormales, i tuvo una grande enfluensa durate su vida. Bettelehim pensava ke el autizmo no tiene una baza organika, ma es el resultado de madres ke no tienen una afeksion apropriada enverso sus kriaturas.
En «The Use of Enchantment», ande el analiza las konsejas de los Ermanos Grimm en terminos de la psikolojia freudiana, Bettelheim deskute la emportansa simbolika i emosional de los kuentos de feyas para las kriaturas. El sostiene ke estos kuentos, kon el abandono, la muerte, las brushas i los espantos, ayudan a las kriaturas a superar sus problemas. Si eyos pueden meldar i interpreter estos kuentos de feyas a sus manera, el pensava ke pueden ambezarsen emosionalmente munchas kozas i puedan aprontarsen mijor a sus vidas futuras. Su livro publikado en el 1976 resivio el «U.S. Critics Choice Prize en el 1977. Algunas de sus teroias fueron kontroversas, komo mizmo su personalidad. A la fin de su vida, Bettelhein sufria de depresion i parese ke tenia difikoltas kon su mujer. En el 1990 el se suisido, i fueron reveladas kozas sovre la autentisidad de algunas de sus kredensiales akademikas, i ademas salieron bozes de estudiantes en la universidad , ke disheron ke era un kruel tirano, mientres ke djenitores, las kriaturas de los kualos fueron ayudados por su tratamiento lo konsideravan un ombre yeno de kompasion.
Matilda Koen-Sarano
