Las Notas de Matilda – Poezia: Serro los ojos

Serro los ojos

Serro los ojos i veo a ti.
Siento un kante i penso a ti.
Una palavra me avla de ti.
Vo a un lugar i enkontro a ti.

Todos me dizen: Ya pasará,
El tiempo kura kada yará*.
Ma yo sto sigura ke yará no es.
Este rekordo muy dulse es.

Strechava tu mano yena de kalor.
Bezava tus lavios yenos de amor.
Esto ya sé ke mas no tornará.
Dulse i amargo en mí kedará.

*ferida/herida

Matilda Koén-Sarano, 2013

Kada semana, Matilda Koen Sarano mos konta sovre kuentos, muzika i otras kozas ke eya va arekojendo…