Las Notas de Matilda – Poezia: EL KAZAMENTERO

EL KAZAMENTERO
A mi ijo Yossi

Ayde manseviko,
Basta dehiar.
Toma una ijika
Para despozar.

Dime si la keres
Kon muncha pará,
O si la preferas
Komo tu mamá

La keres tu alta,
La keres minyón,
O la keres dulse
Komo un bombón.

Kítala de kaza,
Yéval’a komer,
Mándale de rozas
Un grande paner.

Sale a la kaleja,
Tómala engajé,
Dá una bueltizika,
Entrala al kafé.

Métete a djenoyos,
Deklárale ‘l amor.
Dile ke la keres
Kon muncho ardor.

I si te acheta,
Vate al kuyumdjí,
Mérkale el aniyo
I akódrate de mí.

Matilda Koén-Sarano, Yerushaláyim, 7.7.1993

—————————————————————————–

Kada semana, Matilda Koen Sarano mos konta sovre kuentos, muzika i otras kozas ke eya va arekojendo…