eSefarad Noticias del Mundo Sefaradi
BLANKA
A Miriam, mi ermana
La gatika de mi ‘rmana
Noche entera mauyó.
S’asentó en la ventana
I durmir no me deshó.
“Azela salir afuera,
Ke pasee al lunar.
Ay un gato ke l’aspera,
Ke pue’ser es su mazal”.
Mi erman’avrió la puerta,
Komo flecha eya salió.
Dio un salto a la guerta,
I ay se desparesió.
No pasaron ni tres días,
La gatika aboltó,
I la prov’ermana mía
Kon tres chikos se topó!
Matilda Koén-Sarano, Ramat-Gan, 15.9.1995
Múzika de Haim Tzur
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
