eSefarad Noticias del Mundo Sefaradi
Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Reuven Rubin
(Gálati, Romanía, 1893 – Tel-Aviv, 1974)
De Answer.com
Reuven Rubin es un pintor israeliano nasido en Romanía, ke arivó a Yerushaláyim en el 1912 i empesó sus estudios de arte en la Akademia Bezalel, pintando en estil naívo. Tópandose en kontrasto kon sus maestros en la Akademia, se transferó a París en el 1913, ande kontinuó sus estudios en la «Ecole Nationale Supérieure des Beaux-Arts».
Al eklatar de la Primera Gerra Mondial fue ovligado de deshar París i tornó en Romanía, ande pasó los anyos de la gerra i en el 1921 se fue a los Estados Unidos kon su amigo, el artista Arthur Kolnik, kon el kual partajó el estudio en Cernauti.
En New York los dos enkontraron al artista Alfred Stieglitz, ke los ayudó a organizar sus primera muestra amerikana. En el 1922 los dos pintores tornaron a Evropa i en el 1923 Rubin se embarkó para Palestina, ande dechizó de estableserse.
Akí se metió al lavoro, kreando un muevo, orijinal estil de Erets Israel. Sus temas rekorrientes son los panoramas de Erets Israel, su folklor i su populasión: figuras de djudiós yemenitas i hasidim, i de árabos, panoramas de Yerushaláyim i de la Galilea debasho del sol, i temas bíblikos. Su ovra fue enfluensada por la pintura de Henri Rousseau.
En el 1924 fue el primer artista a tener una muestra a solo en la Torre de David, i se izo prezidente de la Asosiasión de los Pintores i Eskultores de Palestina. Entremientres él desinava shenas teatrales para la Habima i el Ohel. Del 1948 al 1950 Rubin fue el primer ministro plenipotensiario israelí en Romanía.
En el 1964 resivió el premio Dizengoff i en el 1973 el Premio de Israel. Su biografía «Mi vida – mi arte» fue publikada en el 1969. El murió en Tel-Aviv en el 1974, deshando a la sivdad de Tel-Aviv su kaza i su koleksión de pinturas. El muzeo Rubin fue avierto en el 1983.
