eSefarad Noticias del Mundo Sefaradi
Kada martes, Matilda Koen Sarano mos konta sovre Personalidades de Israel.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Sir Moses Montefiore
Finansero, mesenat i filantrop
Nasió en Livorno en el 1784 de una famiya sefaradía. Kuando tinía pokos mezes se transferó kon su famiya en Londra. Tornó munchas vezes a Livorno i izo emportantes donasiones, asta la konstruksión de una sinagoga en Livorno.
A 28 anyos se kazó kon Judith Cohen, ija de uno de los rikos djudiós inglezes en akeyos días. Fue un matrimonio muy orozo, malgrado ke eyos no tuvieron kriaturas. Los dos eran muy relijiozos. Lady Judith murió a 78 anyos en el 1862, mientres ke él bivió asta el 1885 (a 101 anyo).
El djiró el mundo, siempre para ayudar a los djudiós, i se enkontró kon el sultán i kon Mohamed Alí en Ejipto por la kestión de la kalomnía de la sangre (Damasko 1840).
Estuvo en Eretz Israel i vijitó las 4 sivdás santas. Dio ayudos finansiarios i posibilitá de lavoro. El kartié de Yemín Moshé en Yerushaláyim fue fondado por él en el 1860, i tomó su nombre. En el sentro del kartié izo konstruir el mulino, para ayudar a los abitantes del kartié mizmo.
Después de la reunifikasión de Yerushaláyim en el 1967, el kartié fue restorado i se izo sentro de arte i de múzika. El mulino se trokó en un chiko muzeo sovre las aktivitás i los viajes de Sir Moses Montefiore, i sovre la istoria de Yerushaláyim. Detrás del mulino se topa la kopia de la karrosa del gevir, porké la suya fue kemada.
Matilda Koen-Sarano
