eSefarad Noticias del Mundo Sefaradi
Kada semana, Matilda Koen Sarano mos konta artikolos, kuentos i istorias.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
La misión de Israel
Semina al vento – Afredo Sarano – 1942- 1995
Ay djudiós ke pensan i kreyen ke la misión de Israel se eksplika mijor, biviendo en el galut adientro de otros puevlos. Eyos dizen: «Deké ir a enserrarse en un paíz, achikarse kon un nasionalizmo, kuando se tienen al lado puevlos, a los kualos se puede regalar la plenitud de muestra entelijensia, el trezoro ke mos tranzmetieron muestros antepasados, ets.»
Ay otra tendensia entre los djudiós ke pensa: ya abasta bivir komo un puevlo errante i exiliado en el mundo, dependiente de la buendá i de la negregura de los otros. Ya abasta bivir komo los eternos sirvidores, los eternos konsejeros utiles i siempre tomados a patadas; ya basta de ser los eternos mártires. Una vez por siempre lavoraremos para mozotros mizmos, toparemos de muevo muestra kalma, i en el repozo i la trankilidad de muestra sede, toparemos muestros valores verdaderos, muestra fizionomía verdadera, toparemos de muevo akeya fuersa ke mos izo diktar un muevo biervo a la umanidad, i ke oy va tornar a azermos dizir akeya palavra ke alelumbrará de muevo por milenios el kamino de los ombres.
Kuala de las dos tendensias tiene razón? Siguramente la sigunda.
La aliyá a Israel es komo el matrimonio
Semina al vento – Alfredo Sarano – 1972-1995
A kualo se puede komparar la aliyá? A un matrimonio, el matrimonio ke un djudió kumple kon Eretz Israel.
Ay ken se kaza presto, ay ken se kaza tadre; ay ken va presto a Eretz Israel i ay ken va tadre. Es verdá ke los mas ermozos kazamientos son los ke se kumplen en djoven edá. Ma no son de despresiar i las aliyás de personas maduras. Eyos arivan kon el pezgo de sus eksperiensia, kon la fuersa de sus kapachitás, ansí ke de sus matrimonio naserán frutos buenos i sanos. …
Ay ken ariva por entuziazmo, ken por razonamiento i ken por intereso.
Tanto mas la novia es inarivable, tanto mas se azen esforso para obtener su mano. I los djudiós están aziendo todo modo de esforsos para ser dinyos de Eretz Israel.
No se deve asperar para kuplir la aliyá, si no, puede afitar lo ke afita a siertos viejos solterones, ke a fuersa de pensar ke no ay una novia adapta a eyos, se dehian, i no se kazan nunka, i después se desplazen ke no lo izieron, kuando ya es demaziado tadre.
Mizmo la novia mas ermoza, después de la boda, podrá provokar diziluzión, komo afita i por Eretz Israel.
La aliyá a Eretz Israel es dunke komo el matrimonio. Se puede arivar a Israel en djoven edá, komo se puede kazarse en los anyos de la djuventud. Se ariva a Israel en edá avansada, komo se puede arivar al matrimonio en edá avansada. Se suve a Israel para kedar akí la vida entera, komo después del kazamiento, se keda la vida entera kon la mujer del korasón.
Se puede arivar a Israel i desharla, ma, komo kuando se abandona la mujer del korasón, se keda siempre atados a eya idealmente.
