eSefarad Noticias del Mundo Sefaradi
Kada semana, Matilda Koen Sarano mos konta artikolos, kuentos i istorias.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
La espesia de shabat
Un tiempo avía un grande i riko emperador ke se yamava Antoninus. Antoninus tinía todo: oro, plata i diamantes i todo lo ke kería, ma kon el tiempo empesó a enfasyarse i a ser muy triste.
Sus konsejeros, para azerlo alegrar, le trusheron elefantes, lonsos i djirafas ke baylavan. Le trusheron maymonas ke komian bananas kon la kashka i bufones ke azían riyir, ma nada no sirvió, el emperador no salió de su tristeza. Asta ke uno de sus konsejeros le disho: «Va a Tsipori, ay mora Rabí Yeudá Anasí. El es un grande haham i no te vas a enfasyar en su kompanía.»
Antoninus se suvió a su karrosa i después de un largo viaje arivó tadre de shabat a la kaza de Rabí Yeudá Anasí, abashó de la karrosa i dio a la puerta del rabino.
La ija de Rabí Yeudá Anasí avrió la puerta i se espantó, porké rekonosió al emperador de su kara ke estava enriva de las monedas de plata. De vista yamó a su padre, ke kumbidó al emperador a entrar, sin enkorvarse delantre de él, i lo envitó a asentarse a la meza, ande estava asentada su famiya.
Las kandelas estavan ensendidas i enriva la meza estavan las halot, el vino i munchas buenas kumidas.
El emperador gostó la supa i se disho: «A, ke supa!» I ansí fue por el pishkado, las kioftés, el poyo, la salata… Disho: «Rabí, nunka no tengo komido kumidas tan savrozas. Vo vinir martes a komer de muevo estas kumidas.» I se fue.
La famiya de Rabí Yeudá Anasí empesó de día de alhad a aprontar la kumida para día de martes, merkando las kozas mas mijores ke avían en el merkado.
Martes arivó el emperador i se asentó a la meza, ma de las primeras kucharas de supa él vido ke la kumida no tinía la mizma savor de la ke avía komido shabat.
Antoninus disho: «A esta kumida manka alguna koza. No tiene la mizma savor de la ke komí akí shabat!»
«Es verdá» disho Rabí Yeudá Anasí, «Le manka una espesia.»
«Ke espesia le manka?» disho el emperador, «Traela presto!»
«Es emposible!» disho Rabí Yeudá Anasí, «Akel día la teníamos. Oy no podemos obtenerla!»
«Kualo?!» disho el emperador, «Yo puedo azerte traer la espesia ke keres!»
«No,» disho Rabí Yeudá Anasí, «Es emposible. Esta espesia se topa sólo en día de shabat!»
«Ke kere dizir? No esto entendiendo!» disho el emperador kon ravia.
«Kuando viene shabat,» disho Rabí Yeudá Anasí, «sovre la meza están la atmosfera de shabat, el silensio de shabat i la luz spesial de shabat. Estas kozas son la espesia spesial ke apartiene sólo al shabat.»
(Del Midrásh)
(Traduksión al ladino de Matilda Koén-Sarano, 2012)
