eSefarad Noticias del Mundo Sefaradi
Preavizo
Un ombre entra en un bar, korriendo i dize al ombre del bar: «Dame un whisky, presto, antes ke empese el pleto!»
El ombre del bar se lo da.
El se lo beve en un sorvo i le dize: «Dame otro whisky, antes ke empese el pleto!»
El ombre del bar le da el sigundo whisky.
El se beve i éste en un sorvo i le dize: «Dame otro whisky, antes ke empese el pleto!»
El ombre del bar le da el treser whisky.
El se beve el treser whisky presto presto i le dize: «Dame otro wisky, antes ke empese el pleto!»
Le dize el ombre del bar: «Ma de ke pleto estás avlando? Ande va aver pleto?»
Le dize él: «El pleto ya está para empesar, porké yo no tengo parás para pagarte!»
Kontado por MATILDA KOEN-SARANO – 2014
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
