eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
UNA BUENA LISIÓN
Un djidió dechizó de merkar un azno para ke lo ayude en el kampo.
Una demanyana disho a la mujer: «Me vo ir a la feria a merkar un azno.»
Le disho la mujer: «Di: Si kere el Dio!»
Le disho él: «Si kere i si no kere, yo vo ir a merkar un azno!»
Salió el ombre de kaza i se metió en kamino para la feria.
Era un día keynte, i él se kansó i se estiró a deskansar debasho de la solombra de un árvol a los bodres del kamino. El ombre se durmió por la kanseria.
Pasaron ladrones i profitaron de la situasión, le tomaron todas las parás i se desparesieron.
Kuando el ombre se despertó i vido ke le rovaron las parás, tornó a kaza i disho a la mujer: «Amanyana vo ir a la feria a merkar un azno.»
Eya le disho otra vez: «Di: Si kere el Dio!»
El le respondió komo la otra vez i salió.
Era de muevo un día keynte. El ombre se kedó en una meaná en kamino, para bever una bivienda yelada. De akí i de ayá el ombre bevió i se emburrachó, i se durmió sovre el banko.
Pasaron ladrones i le rovaron las parás.
Kuando se despertó i vido ke le rovaron las parás, tornó a su kaza triste i verguensozo.
Batió a la puerta i disho a la mujer: «Si kere el Dio, ya torní!»
Le respondió la mujer: «Bovo eras i bovo kedates. Si kere el Dio se dize kuando se sale i no kuando se torna!»
—————————
Kontado por SHMUEL COHEN– 2007
(Del livro «Kuentos de todos los tiempos – La Sosiedad», de Matilda Koén-Sarano, vía de publikasión).
Buen dia a mi me encantaria poder aprender ladino soy de mexico y aqui no hay gente que lo hable me podrian ayudar??
Gracias
Moshe L.