eSefarad Noticias del Mundo Sefaradi
Saverse «kitar de la prezión»
Un lavorador estava en la kaye, adovando los kaminos i aziendo un bruído terrible. Ensupitó de una ventana de arriva le echaron una piedra, ke kuaje le vino sovre la kavesa. Por un nes no lo deskalavró.
Yeno de ravia, el lavorador tomó la piedra en la mano, suvió al primer etaje i dio a la puerta.
Le avrió uno i le disho: «Ke keres?»
Le disho él: «Tú me echates esta piedra…»
Disho él: «No te la echí yo! Es siguro ke te la echó el de arriva, ke es un loko…»
«Bueno,» disho él, suvió arriva i dio a la puerta, pronto para aharvar.
Le avrió otro ke le disho: «No! Yo no te echí nada… Mira, ay arriva uno… Propio un zevro! Es siguro ke es él ke te la echó!»
El lavorador suvió arriva raviozo i dio a la puerta.
Le avrió un ombre alto, godro, kon una kara … ke le demandó kon una boz godra:
«Ke keres?»
Le disho él: «Sos tú ke me echates esta piedra?!»
«Sí!» disho él, «Para kualo vinites? Dímelo, si tienes el koraje…»
«Vini a darte atrás la piedra!» le disho el lavorador. Se la metió en mano i se fuyó.
Akel se kedó a boka avierta.
Kontado por MATILDA KOEN-SARANO – 2014
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
