eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
«PARTO EN KAZA»
Mozotros morávamos en Yemín Moshé. Un día mi madre i mi tía estavan asentadas en kaza i stavan avlando. End’una sintieron keshas viniendo de ahuera.
Miraron por la ventana i vieron al lado de los árvoles una mujer áraba en gueykos en basho, ke stava para parir.
Salieron ahuera i la izieron entrar de vista en kaza. La echaron a la kama i la ayudaron a parir.
La mujer parió un ijiko, i mi madre i mi tía la miraron a eya i al ijiko por tres días.
Después de tres días se avrió la puerta, entró un árabo kon kara araviada i se aserkó a la kama.
La mujer s’alvantó entera spantada.
Mi madre alvantó al ijiko, se lo amostró al ombre.
El ombre se maraviyó muncho i empesó a sunriyirse.
El izo senyas a la mujer, i eya emburujó a la kriatura kon las ropikas ke le dio mi madre, bindisho a mi madre i se aparejó a irse.
I el marido bindisho a mi madre, i los dos se hueron.
Después de tres días vino el árabo kon un azno kargado de todo lo bueno para mi madre. I después, kada anyo, asta ke se izo el Estado de Israel, él tornó a trayer sus regalos a mi madre.
———————————————————-
Kontado por SHLOMO MEYUHAS – 1988
(Del livro «Kuentos de todos los tiempos – La Sosiedad» de Matilda Koén-Sarano, Ed. S. Zack, Yerushaláyim, en vía de publikasión).
