eSefarad Noticias del Mundo Sefaradi
«Para Pésah»
Avía un marido i una mujer rizín kazados. La mujer era ermozika, ma bovika.
El marido, pasado Purim, empesó a traer a kaza kada día paketos i paketos. Se los dava a la mujer i le dizía: «Esto mételo d’aparte, es para Pésah.» I eya los metía en un kantón.
Kon el pasar del tiempo en el kantón se formó un munturón de paketos, ke empesó a deranjar a la mujer.
Un día pasó por ayi un eskidjíi, gritando: «Mujeres! Merko i vendo, merko i vendo!»
Le demandó la mujer a la vizina: «Ken éste? Kualo merka i vende?»
Le disho la vizina: «Este es Pésah el eskidjí, merka i vende todo modo de kozas.»
«A!» disho eya, «Pésah? Tengo munchas kozas para él.»
Lo yamó de la ventana i le disho: «Suve a mi kaza. Tengo munchas kozas de darte.»
El eskidjí suvió arriva, eya le amostró el munturón de paketos i le disho: «Mira, mi marido trusho todo esto para ti. Tómalo i dezbarásame la kaza!»
Le disho el ombre: «E, bueno, ma komo ke me lo yeve?»
Le disho eya: «Na, toma parás, va alkila una arabá i tráela akí.»
El eskidjí fue, trusho una arabá, kargó todo i antes de irse le disho: «El Dio ke te bindiga i ke mande todo lo bueno a tu kavesa!» I se fue.
Vino a la noche el marido kon otros dos paketos, fue a meterlos al kantón, ma lo topó vazío. Le disho a la mujer: «Kualo akontesió? Ande está todo lo ke te trushi para Pésah?»
Le disho eya: «Ya vino Pésah. Yo ya le dí todo, i él me bindisho i me disho ke el Dio mande todo lo bueno a mi kavesa.»
«Ansí sea!» disho el marido i echó sovre la kavesa de la mujer los dos paketos ke tinía en las manos.
Kontado por MATILDA KOEN-SARANO – 2014
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
