Las Notas de Matilda – Kuentos Populares: "LOS EXEMPLOS DE LOS RABINOS" – Exemplo 210

Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER

Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986

EXEMPLO 210

Ambezaton muestros mestros: No se deve kitar piedras de una propriedad privada a la kaye.

Una vez un ombre estava kitando piedras de su propriedad privada a la kaye públika.

Lo vido un ombre piadozo i le disho: «Bovo! Porké kitas piedras de un lugar ke no es tuyo i las echas a un lugar ke es tuyo?»

El ombre se metió a riyir.

Dizen ke después de unos kuantos días ael ombre estuvi en estrechura I vendió el kampo. Kaminando por akel kamino entrompesió en akeyas piedras.

Disho: «Tinía razón akel piadozo kuando me disho: – Porké kitas piedras de una propriedad ke no te apartiene a un lugar ke te apartiene?»

Fuente foto rabino: UCL LIBRARY