Las Notas de Matilda – Kuentos Populares: "LOS EXEMPLOS DE LOS RABINOS" – Exemplo 184

Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER

Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986

EXEMPLO 184

Ambezaron muestros maestros: Una vez el governo mandó emisarios al kampamento de Peor i les disho: «Andá a bushkar la tomba de Moshé, después torná i dígamos onde está».

Akeyos se fueron al kampamento de Peor. Kuando la bushkavan por arriva, la vían abasho, i kuando la bushkavan abasho, la vían arriva.

Se divizaron i fueron una metad a la sima i la otra metad a la falda.

De arriva la vían abasho i de abasho la vían arriva. Para ke se kumpliera lo ke está dicho: «I dinguno konose el lugar ande está enterrado (Deut.34, 5)».

Fuente foto rabino: UCL LIBRARY