eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER
Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986
EXEMPLO 30
Ambezaron muestros maestros: En una okazión se prezentó un djentil delantre de Shamay el viejo i le disho: «Kuantas leyes vos fueron dadas?»
Le respondió Shamay: «Dos».
Le disho el ombre: «I kualas son?»
Respondió Shamay: «Una eskrita i otra oral».
Le disho el ombre: «La eskrita te la aksepto, ma la oral, no».
Shamay lo gritó i lo ekspulsó kon indinyasión.
Akel djentil se prezentó delantre de Hillel el viejo i le disho: «Kuantas leyes vos fueron dadas?»
Le respondió Hillel: «Dos».
Le demandó el ombre: «I kualas son?»
Le disho Hillel: «Una eskrita i otra oral».
Disho el ombre: «La eskrita yo te la aksepto, la otra, no».
Le disho Hillel: «Aséntate, ijo mío, aséntate i yo te lo eksplikaré».
El se asentó. Hillel le eskrivió una «alef» i le disho: «Kualo es esto?»
Le respondió el ombre: «Esto no es la «alef», si no la «bet»».
Entonses le eskrivió una «bet» i le disho: «Kualo es esto?»
Le respondió el ombre: «Bet».
Le disho Hillel: «No es «bet», si no «alef»». I adjustó: «Ijo mío, de ande saves tú ke esto es «alef», esto es «bet» i esto es «gimmel»?»
Le respondió el ombre: «Lo akseptí de ti kon fey».
Le disho Hillel: «Ijo mío, del mizmo modo ke akseptates esto kon fey, aksepta también lo otro kon fey».
Fuente foto rabino: UCL LIBRARY
