eSefarad Noticias del Mundo Sefaradi
«La moneda antika»
En un kongreso de rabinos, kuando eskaparon las sesiones, los rabinos se fueron a komer.
Mientres ke estavan komiendo, uno de eyos se alevantó, kitó de la aldukera una moneda i disho: «Mirá, esta es una moneda del tiempo de David Améleh. Es muy rara!» i la pasó a todos los rabno al derredor de la meza.
Ensupitó la moneda se desparesió. Empesaron a bushkarla debasho de los platos, debasho de las kupas, debasho de las pechetas, ma no se estava topando.
Disheron: » No se save nunka. Para estar siguros, mos bushkaremos enriva, los unos a los otros.»
En akel punto uno de los rabinos se izo palido i empesó a sudar. Lo miraron todos muy kuriozos.
Entremientres disho el rabino patrón de la moneda: «Komeremos antes i después veremos.»
Akel rabino se kalmó, ma a la fin de la kumida, kuando disheron: «Agora kada uno va deskarvar a su vizino.» él se izo blanko i kolorado i empesó a sudar de muevo. Todos lo miraron otra vez.
Ensupitó entró un ijiko de la kuzina i disho: «Mirá, topí esto en un plato suzio!» i amostró la moneda antika.
Todos echaron un suspiro de alivio, ma le demandaron al rabino ke se sintió mal: «Kualo te akontesió? Deké te emosionates tanto?»
Les disho él: «Yo tengo en la aldukera una moneda mizma a ésta, i me espantí ke me ivash a akuzar de ladronisio!»
Kontado por MATILDA KOEN-SARANO – 2014
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
