Las Notas de Matilda – Kuentos Populares: LA KUCHARA DE TAVLA

Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

LA KUCHARA DE TAVLA

Avia un marido i una mujer. La mujer parió un ijo, ama tuvo parto huerte i se murió.
El padre lo engrandesió al ijo kon muncha pasensia i muncha amistá, i disho ke no se va kazar kon otra. No kere ke el ijo tenga otra madre.
Kuando el ijo ya se izo grande, le disho: “Kero ke te kazes. Me kero alegrar. Kero ver inyetos, antes ke me muera”.
No pasó muncho tiempo, ya se kazó el ijo, i ya le nasió un ijiko.
El padre morava kon el ijo.
El ijiko ya s`izo de tres anyos i está muy entelijente.
El papú lo kiría muncho bien: lo pasiyava, lo arregalava…
A l`almuera l`empesó a `nfasiar. Le dava a komer al papú en un chiní de zingo kon una kuchara de tavla.
El chikitiko le disho al papú: “Papú, deké tienes otro modo de kuchara?”
Le disho el papú: “A tu padre i tu madre les parese ke yo kare ke koma ansina”.
Al otro día el chiko se hue s`asentó a la guerta, i está embelekado ayá de la demanyana asta la mediudía.
A mediudía vino el padre, le disho a la mujer: “Onde sta el ijo?”
Disho eya: “No sé. Sta ayí de la demanyana, a la guerta, debasho de un árvol”.
Lo yamaron. El disho: “No agora… otr`un poko! Otr`un poko!”
Hue a ver el padre kualo sta aziendo. Le disho: “Kualo stas aziendo?”
Le disho el ijiko: “Kití un pedaso de tavla del árvol, i kero azer una kuchara, komo la kuchara del papú. La vo guadrar para kuando vas a vinir a komer ande mí, i te vo dar a komer kon esta kuchara”.

Kontado por SOL MAYMARAN – 1994
Notado i redaktado por Matilda Koén-Sarano