eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
KON LO KE VIENE DE DETRÁS
Un ombre riko, inyervozo, exijente i despasensiozo trokava siempre a sus mosos. Su karakter era tan difisil, ke dingunos no podían suportar este patrón. El pensava ke todos eran sus esklavos i devían lavorar noche i día. Les kitava l`alma.
Un día se prezentó Moshiko, pensando ke lo iva meter a la razón. Era un mansevo entelijente i lavorador.
Kuando lo vee el patrón, le dize: «Mira, ombre, yo no avlo muncho. Kale ke tú entiendas kon dos biervos lo ke kero. Es i kon lo ke viene de detrás. Por exempio: Me alevanto a las ocho, el banyo deve de estar pronto! Al salir del banyo, presto el kafé i el dulse kon agua! Kuando torno del echo, kero las pantuflas, el jaket de kaza, el jornal, el sigarro kibut, la tavlá de siniza. La meza de komer por la noche es a las ocho i media; el komer pronto, mezés, rakí, supa keyente, el pan kortado, i enfín a las diez me echo. Todo deve de estar pronto: la kamiza de echar, la kama avierta, el kultuk unflado, la buyot kayente si es invierno; si es enverano, la ventana avierta para ke me venga ayre.»
Ya entendió Moshón! Estava lavorando komo un esklavo vindido. Ke se aze? Ganar parás kale…
Un día a las ocho no se alevantó el mestro. Lo yama i le dize al moso: «Oy estó muy hazino. No me vo ir al echo…»
Viene el buen de Moshiko, presto le trae el grado, el chay, la aspirín, la buyot. Telefona al doktor, telefona al papás i enkomenda la kasha onde se meten los muertos, i el lugar de enterrar al semeterio.
Kuando ve todo esto, el patrón furiozo avre grande los ojos, lo kere aharvar: «Kualo es esto, ijo d`un azno? Kualo izites?»
«E, sinyor mestro, tú no me dishites ke kere todo kon lo ke viene de detrás? Después de la hazinura fuerte viene la muerte. El papas te va konfesar i después te van a enterrar!»
Kontado por SARA KENT – 1997
Notado i redaktado por MATILDA KOEN-SARANO
