eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
KOMO DESPARTE EL DIÓ
Tres mansevos toparon un sako de muezes. Disheron: «Komo mo lo vamos a despartir? No savemos.»
Disheron: «Akí ay un haham. Vamos and’él ke mo lo desparta».
El haham disho: «Komo ke vo lo desparta? Komo desparte el Dio, o komo desparte la djente?»
Los mansevos pensaron entr’eyos: ‘Komo desparte el Dio!’ Disheron: «Komo desparte el Dio sería mas djusto».
Vino el haham, aferró un punyado, le echó al uno, al otro le echó diez d’eyas, al otro le dio dos d’eyas, i ansina ansina asta ke el sako s’eskapó.
El uno se topó kon los tres kuartos del sako, el otro kon un kuarto i el otro kon vente muezes.
«Sinyor haham, komo sta despartiendo?» disheron los mansevos.
Dize el haham: «Ansina no desparte el Dio? A uno le da tres kazas, a otro le da una kaza en Cheshmé, a otro le da una vila, a otro le da una kaza sólo para morar, el otro no tiene ni kaza para morar…» dize.
«E, ansina desparte el Dio?…»
«No vitesh komo es el mundo? El uno es muy muy riko, el otro tiene apenas para bivir, el otro no tiene ni pan para komer…» disho el haham.
«E, despártemolo komo desparte la djente» disheron los mansevos.
«Bueno!» disho el haham, «Uno, dos, tres… uno dos tres…uno …dos…tres…»
Ansina el sako se skapó i las muezes se despartieron en manera igual.
«La djente desparte en esta manera.» les disho el haham.
Kontado por REJINE ISRAEL – 1996
Enrejistrado por la Prof. SHOSHANA WEICH-SHAHAK
Del livro «Kuentos de todos los tiempos – La Sosiedad», de Matilda Koén-Sarano, en vía de publikasión
Muy muy lindo el teksto ke mos prezenta Matilda Koén siempre aziendo muncho per la lingua ladina.
Todá Matilda!