eSefarad Noticias del Mundo Sefaradi
Komo aferrar marido
Avía un mansevo muy ermozo ke bivía kon la madre, i novia no avía para él. Esta era siega, l`otra era kosha…En kada una i una topava una koza.
Vino una d`Estanbol un poko grandezika, disho: «Yo me v`azer entrevista kon él. Lo ke kere ke sea!»
«Kualo?» le disheron, «A ti te va tomar éste?… este tanto ermozo mansevo, ke le sta viniendo tanta muchacha?…Tú» le disheron, «la narís la tienes este boy… Tú entera sos bavá!…»
«Ya v`a saver yo komo lo vo tomar!» disho eya.
Se izo la entrevista. Vino el disho: «La envitaré a bever un kafé.»
Se fueron a bever un kafé, aval él sta mirándola: no sta para él.
Eya sta beviendo el kaviko, sta riyéndose, sta avlando. Lo vido ke sta kon kara, le disho: «Las oras ke te dí la mano non me kedó en tino l`alkunya tuya.»
Vino él, le disho: «L`alkunya mía es Merkante.»
«Aaa, Mekante?» disho eya, «Sta bueno.»
Le disho él: «Una koza te v`a demandar yo: la chiminea de tu kaza es derechika?»
«Mira,» le disho eya, «Yo ya sé ke a ti ésta no t`agrada, akeya no t`agrada… Yo ya sé ke la narizika la tengo delada, aval la chiminiyika ya trava bueno el umo, afilu ke sta deladika. I komo l`alkunya tuya es Merkante, si vinías diez anyos antes, yo no me azía tanto grande!»
«Tú es ke sos para mí!» le disho él i la tomó.
Kontado por SHOSHANA LEVY – 1991
Notado i redaktado por MATILDA KOEN-SARANO
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
