eSefarad Noticias del Mundo Sefaradi
«Komer sin espanto»
Djohá, ke ya se izo un tulum del muncho komer, iva kada día al restorante, komía, komía, komía, se alevantava de la meza i dizía: «Yo no pago i no me espanto!» i se iva. I ansina kada día.
El patrón de restorante no savía kualo azer. Kuando perdrió la pasensia, trusho dos mansevos forsudos i les disho: «Kuando él va dizir: Yo no me espanto, dalelde una una haftoná, ke no venga mas.»
Al día vino Djohá komo siempre, se asentó, komió, komió, komió i kuando eskapó disho: «Yo no pago i no me espanto!»
Le disheron los mansevos, menasándolo: «I mozotros no mos espantamos!»
«Si es ansina,» les disho Djohá, «asentavos i komé i vozotros!»
Kontado por MATILDA KOEN-SARANO – 2014
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
