eSefarad Noticias del Mundo Sefaradi
«Ke ladrón!»
Un ladrón entró en la kaza de una mujer sola. Entró i le gritó: «Es una rapina! Dame todo lo ke tienes!»
Eya le dio pishín todo lo ke tinía, ma él bushkó también en los almarios i los kashones. Arrekojó todo i lo metió en un sako ke se trusho kon sí.
En akel punto se sintió la sirena de la polisía.
Al ladrón le paresió ke la polisía está viniendo para él. Deshó el sako, saltó por la ventana i vido ke la polisía no vino para él.
La mujer, kuando vido ke la polisía pasó sin kedarse i el ladrón kedó ay afuera entero espantado, sin menearse, kitó la kavesa de la ventana i le gritó: «Mintirozo! Tú no sos ladrón! No te des ayres!»
Kontado por MALKA KALDERON – 2014
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
