eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
KADA UNO I SU PAGA
Un rey dezeó enkolgar una pintura en su palasio. Demandó a su servidor ke publikara un anunsio, diziendo ke el rey está bushkando un pintor, ke le aga un kuadro grande, para enkolgarlo en la sala de resepsión del palasio.
Vinieron al palasio munchos pintores i propozaron sus lavoros.
D’entre todos los ke vinieron, dos lo empresionaron muncho al rey, i él los deskojó.
Antes ke empesaran, el rey metió komo kondisión ke las pinturas deven ser terminadas dentro de un anyo.
En medio de la sala fue metido un perdé, para ke los dos lavoren en trankilidad. Kada uno devía de pintar en su parte. El uno empesó a pintar kon muncho gusto i dezeo de kitar basho de sus manos una ovra ekstraordinaria.
El otro se haraganeó, diziendo: «Tengo muncho tiempo asta la fin del anyo.»
Ansina pasaron los mezes, i el uno estava por terminar su ovra, mientres ke el otro estava asperando al buen día de tener la inspirasión, ansí ke a la fin no abastesió mezmo a empesar su lavoro.
El día fiksado, viendo ke no izo nada, el haragán enkolgó un espejo grande en la pared, kitó el perdé, – i ke maraviya! – en el espejo él vido la pintura de su amigo.
El rey los yamó a los dos pintores i les demandó de ver lo ke avían pintado.
Entrando en la sala, el primer le amostró su pintura, i kuando el rey se aboltó, la vido reflektada en el espejo. Ya entendió pishín.
El rey no disho nada, sólo ordenó a los dos pintores ke salgan del lugar, diziendo ke serkamente les va pagar. Pasó poko tiempo i él los yamó ke entren de muevo a la sala.
I los dos entraron kon grande emosión.
El rey se metió en medio, entre los dos, i disho al primer pintor: «Te rengrasio. Akí está tu paga.» i le endikó un sakito de monedas, ke tenía en la mano, «Ma aspera un punto…» le disho. I al otro pintor, ke estava asperando sin pasensia, le disho: «Abóltate al espejo… ayí toparás tu paga…»
I el sigundo pintor vido el sakito de monedas en la mano del rey, reflektándose en el espejo ke él mizmo avía enkolgado.
Le disho el rey: «Esta es tu paga. Vate en buena ora!» i dio el sakito de monedas al primer pintor.
Kontado por MEDI COHEN MALKI – 2011
Del livro «Kuentos de todos los tiempos – La Sosiedad», de Matilda Koén-Sarano, en vía de publikasión
