Las Notas de Matilda – Kuentos Populares: "EN MÓSUL"

Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

«EN MÓSUL»

Esto kontava mi padre. Antes del nasimiento mío, o kuando yo stava chiko, mi padre i mis tíos se hueron érev Pésah a zmersar en el shuk para Pésah. Stava kun eyos mi primo ‘rmano Moshe. Moshe era chiko i tinía pony en la frente.

Eyos stavan kaminando, aval Moshe stava atrás; tadró de vinir. Eyos aboltaron la kara: Moshe no sta.

Tornaron atrás para bushkaldo. Lo toparon kon un árabo – un mamzer – ke lo sta anferrando de los kaveyos, i se los kere kitar kun el kuero de la kavesa. Lo kere matar!

El sta ‘chando guayas, i dinguno de los árabos no sta viniendo a salvaldo.

Vino mi padre, le fue ansina al árabo, le dio un shamar i le disho: «Komo de relijión tenésh!…» i empesó a maldizir a Muhámmad.

Pasó dos-tres minutos, uyeron los árabos ke sta maldiziendo a Muhámmad, vinieron, se metieron al deredor de mi padre, para mataldo.

Ensupto se aparesió en medio del rondo de éstos ke stavan ayá arrekojidos un viejo bashetiko, kon barva blanka i un palo en la mano.

El viejo, sin avlar, aziendo ansina kon la mano, se metió arrondjar a uno a uno a todos los árbos.

Asigún él aze ansina, eyos se fuyen atrás. Asigún él aze ansina, eyos se fuyen i se desparesen. Asta ke en todo el rondo no kedó ni uno! Kedó sólo mi padre kun el ijiko. Todos se fuyeron. El viejo no sta! I no se hue kon su pie!

Vinieron le disheron a mi padre: «Vitis? Es Eliau Anaví ke mos salvó!»

Esto akontesió en Mósul. La data? 1911!

———————————————————-

Kontado por ELIAU BARZILAY – 1991

(Del livro «Kuentos de todos los tiempos – La Sosiedad» de Matilda Koén-Sarano, Ed. S. Zack, Yerushaláyim, en vía de publikasión).