eSefarad Noticias del Mundo Sefaradi
El rav Galanti i los liones
Matilda Koén-Sarano
Antes munchos anyos bivia en Yerushalayim un rav muy grande ke se yamava Avraam Galanti. Akel tiempo mandavan shlihim [1] a leshos sivdades, para ke arrekojgan paras para dar a los elevos de la yeshiva [2] ke meldavan dias enteros i tinian famiyas grandes.
Una vez ke avia ambrera en la Sivdad i mankura de todo, desidaron de mandar el Rav Avraam Galanti a Kushta arrekojer paras.
El partio de Yafo kon vapor. Kuando el vapor arivo a la Turkia, vieron ke ay muncha djente en el porto i los soldades estan korriendo i gritando.
El kapitan del vapor disho ke no puede azer abashar la djente del vapor, porke se spanto ke no ay seguridad ke van a kedar bivos i sanos, ansi ke desido de kontinuar el viaje. Ama el Rav Galanti disho ke vino aki para azer su echo i no puede deshar.
Ensi ke el kapitan lo abasho kon barko al porto i el no s’ espanto. El kapitan partio para su kamino.
Kuando el Rav Galanti abasho del barko, le vinieron enkontro soldades kon tiros i le disheron ke dos liones se fuyeron de la guerta de los animales del sultan i todos s’estan espantando de eyos, i ke es mijor ke el se vayga de ayi.
Ensupito salio un lion delantre de el, Rabi Galanti se kedo en su lugar.
El lion se aserko i s’asento al lado de el komo un perro fidelo.
Rabi Avraam Galanti lo travo de la oreja i lo yevo a la guerta del sultan.
En el kamino lo vido al otro lion i kon la segunda mano lo aferro de la otra oreja i ensi kamino asta la guerta del sultan.
Todos estavan kuriozos: “Komo pudo este viejo aferrar los dos liones?”
El sultan lo yamo i le demando komo izo esto.
El le disho ke no es ichizero i ke los djidios no azen ichizos. El le disho ke s’espanta solo del Dio i no de otros.
Le disho: “Kuando el Dio krio los animales, les entro espanto de las djentes. Si las djentes se rijen komo animales, al animal le parese ke aya ay animales i los kere matar, i si las djentes se rijen komo djentes, el animal se espanta de eyos.”
Estos biervos izieron muncha fiaka al sultan, i le dio munchas paras al Rav Galanti, para ke las yeve a Yerushalayim i les ayude a los djidios de aki.
Kontado por HANNA BEN-YEHUDA – 1999
Notado por IFAT BEN-YEHUDA – Eleva de ladino en la “Midrashiat Amalia”, X klasa
Redaktado por MATILDA KOEN-SARANO
——————————————————————–
[1] shlihim: (del ebreo: shaliah ): embiado [2] yeshivot: (en ebreo): eskola rabinika
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
