eSefarad Noticias del Mundo Sefaradi
El doktor de los animalikos
Enfrente de mi kaza ay un magazén onde venden i kuran animalikos.
Ayi uno se keda maraviyado de ver los varios pásharos de kolores, los paragayos, los gatikos rizín nasidos, las geynikas muy chikas i munchas sortes de perrikos, ke tienen para vender i kurar.
Un día trusheron un perriko muy hazino, i el doktor, después de vijitalo, disho al patrón ke no se podía azer nada para kalmar su dolor i se devía ayudarlo a murir.
El patrón tornó a kaza, i kon las lágrimas en los ojos se lo kontó a la mujer, i eya, apenada, le demandó: «Komo se lo vamos a dizir a muestro ijiko. Tiene sesh anyos i se va azer muy triste.»
Pero se lo kontaron lo mizmo, i el ijiko disho ke kería estar al lado de su amigo, para karesarlo, antes ke lo durmieran para siempre, i ansina fue.
Kuando salieron de ande el doktor, la madre, kon las lágrimas en los ojos, demandó: «Deké estos animalikos, ke uno tanto kere, se mueren tan presto?»
Después de uno kuantos minutos de silensio, el ijiko disho: «Yo sé porké. La djente deve bivir muncho tiempo, para ambezarse todo lo ke deve saver, ma los animalikos se lo ambezan mas presto.»
Mi papá mos demandó una vez: «Vozotros savésh porké los perrikos tienen mas amigos ke las personas? Porké menean mas la kola ke la alguenga!»
Kontado por MARIO SORIANO – 2010
Notado i redaktado por MATILDA KOEN-SARANO
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
