eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
«EL ÁRVOL DE KEZO»
Este es un rekordo de mi chikés.
Mi padre, ke en sus primeros mezes en Israel era kazalino i bivió en kibuts, me kontava siempre por los árvoles, las flores, las frutas. Kuando se asembra kada koza, komo kresen los árvoles a la tierra, kuanto ay de rofiar, i simijantes kozas, ke se akodrava de su vida de «kazalino».
Yo era entonses ijika de 4-5 anyos, i era el tiempo de Dov Yosef, los días del defteriko kon «tlushim» por munchas kozas de komer .
En todo esto, un día me mandó mi mamá al bakal, diziéndome ke le trayga un paketiko de kezo blanko. I yo me fui i merkí el kezo.
En kaminando para kaza, kon la kavesa unflada de las konsejas de mi padre, pensí ke va ser buena idea de asembrar el kezo, ansí ke mi mamá i mi papá se alegrarán del arvoliko yeno de kezos ke va kreser en la tierra, djusto al kortijo muestro, debasho de muestra kaza. I asembrí el paketiko de kezo.
Ariví a kaza kon manos suzias, i mi mamá me dimandó pishín deké me tomó tanto tiempo, i ande está el kezo.
Yo le dishe: “No te espantes, mamika, amanyana o al otro día vamos a tener munchos kezos, un arvolé de kezos».
Eya me rispondió: “Fin amanyana el Dio es grande. Agora, ande está el kezo de oy??» “Aínda no intendites?
Lo asembrí!” le dishe.
De akel día mi padre mas no me kontó konsejas por frutas i rozas, i komo ay de asembrar diferentes flores i árvoles… I mizmo del kezo no kresió un arvoliko…
———————————————————-
Kontado por RUTHIE ALON – BOUSCHER – 2006
(Del livro «Kuentos de todos los tiempos – La Sosiedad» de Matilda Koén-Sarano, Ed. S. Zack, Yerushaláyim, en vía de publikasión).
Encomtre este website. Me gusto la istorieta del arbol de kezo. Nosotros en el norte de Nuevo Mexico ablamos asi como nueztros antepasados Ladinos ablaban. Se ezcondieron de la Inquizizion que los persigian desde Espana a las montanas de Colorado y Nuevo Mexico. (dizculpen el deletreo ke estoy muy cyega. Ademas, no se como usar los acentos en la computadoa. Tengo 78 anos.) Mi carrera de autora con istorias ke solo se recordaban despuez de 300 anos escondidos. Por fin cuando el gringo Americano conquizto Nuevo Mexico en 1850 tubimos de aprender ingles. Ya la jobentud esponles solo ablan ingles. Es una pena. Recien tengo dos libros publicado: «Senor Gamblin’ Rabbi from northern New Mexico» como tambien «Mi mochito Sephardim from northern New Mexico.» Ambos se encuntran por Amazon.com. Los articulos que djo escribo siempre en varias pulicaziones aki y alli en ingles kon palabrikas Ladinas aki y alli.
Su servidora,
Jo Roybal Izay