eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
«EL ARTO NO KREYE AL AMBIERTO»
Mi papú era rav de Hevrón. Era rav grande, era Rav Bet-Din i también savía kontar munchas kozas.
Kuando yo era chika una vez mos kontó ke avía un gvir ke les disho a los mosos:
«Oy sta aziendo nyeve, pidrisko, ayre… Yo kero ver kualo stan aziendo los proves un día komo oy.»
«Bashustoné!» le disheron, «Te vamos a yevar!»
Lo mitieron a la karrosa, lo emburujaron kon hiram… Le mitieron un chapeo grande… una sharpa al garón… churapes de lana, i lo yevaron onde stan todos los proves.
Los proves ayí miskenikos, arientro la nyeve… sin churapes… sin kondurias… sin kumer… Un kaldo kayente no tienen… nada…»
«Ay, ay, ay!» disho el gvir, «Estos proves kare ayudados! Kare ke los ayudemos! Agora pishín pishín yevame a kaza, ke me sto muriendo del frío! Yo les vo ayudar. Ke vengan todos, ke s’aparen a la puerta mía, les v’a dar kaldo! Les va dar parás, les va dar hiram!»
Los proves, ke uyeron ke el gvir les va ayudar, empisaron a korrer, a korrer. S’arrekojeron ay muncha djente a la puerta del gvir.
I el gvir intró en kaza. Ya le kayentaron la kaza, ya le kayentaron el kaldo, ya l’izieron chay, ke beva, ke se kayente, ke se stava muncho yelando.
I los proves stan asperando a la luvia, ke les dé alguna koza.
En esto ya pasó una ora, ya pasó dos, intró un moso, le disho al gvir: «Diga, los proves stan asperando. Kualo va ser? Les va dar koza?»
«No!» disho él, «Diles ke ya kayntó el tiempo! Ya kayntó por oras!»
Komo él ya s’ichó a la kama, ya bevió un vino, ya bevió un chay…
«No, agora mándalos en kaza a todos, k’el tiempo ya kayntó. Otro día, si va yelar el tiempo, ya les vo ayudar!»
«Por esto, » dizía mi sinyor papú, el Rav Ben-Tsion Kuenkas, «el arto no kreye al ambierto!» i esto es la moral de la konseja.
———————————————————-
Kontado por ESTER LEVY – 1987
(Del livro «Kuentos de todos los tiempos – La Sosiedad», de Matilda Koén-Sarano, vía de publikasión).
