Las Notas de Matilda – Kuentos: La narís de la s.huegra

La narís de la s.huegra

Un novio i una novia se kazaron. Uvo una boda maraviyoza kon las famiyas de las dos partes. Todos estavan alegres, komiendo, beviendo i baylando.

Antes de la fin de la nochada la novia kitó de su chantika una ridá blanka, ermoza i brodada, demandó silensio del públiko i fue ande su s.huegra,  se la dio i le disho: «Maná, le trushi esta ridá en regalo.»

Todos se kedaron maraviyados: Kualo es esto? Porké una ridá i porké esta noche?

Le disho la novia a la s.huegra: «Este es el úniko lugar ande eya podrá enkashar su narís!»

Kontado por MALKA KALDERON – 2015

Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino