eSefarad Noticias del Mundo Sefaradi
La mizma fuersa
Djohá i sus amigos, ke ya arivaron a una edá avansada, salieron a un paseo.
Uno disho: «Yo, kuando era mansevo, era muy fuerte, pudía kaminar 20 kilometros sin kedarme, ma agora…»
Otro disho: «Yo, kuando era mansevo, era muy fuerte, pudía yevar un frijider sovre la spalda, sin problemas, ma agora…»
Disho Djohá: «Yo se agora fuerte, komo kuando era mansevo.»
«K’estás diziendo?!» le disheron los amigos.
Disho Djohá: «Vo lo provaré!»
Fue al bodre del kamino i bushkó de alevantar una piedra grande i pezgada ke avía ayá, ma no reushó.
Le disheron los amigos: «Vites? No reushites a alevantarla!!»
«I vos parese ke kuando yo era mansevo pudía alevanatarla?» les disho Djohá.
Kontado por MATILDA KOEN-SARANO – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
