eSefarad Noticias del Mundo Sefaradi
Kualo afitó al azno de Djohá durante la karestía?
Djohá disho a su amigo ke no está podiendo dar a komer al azno, a kavza de la karestía.
El amigo le konsejó: «Aze una prova. Da al azno a komer un día sí i un día no, una semana entera.»
Djohá izo ansina. El azno lavoró komo siempre.
La sigunda semana le disho el amigo: «Da al azno a komer un día sí i dos días no.»
Djohá izo ansina i estava bueno. El azno kontinuó a lavorar.
Vieron ke la koza estava indo bien, le disho el amigo a Djohá: «Aze lavorar el azno sin komer.»
Ansina izo Djohá. El primer día el azno lavoró maraviya. El sigundo día lavoró muy bien. El treser día lavoro bien. El kuartén día lavoró. El sinkén día lavoró kon difikoltá. El sején día lavoró kon grande difikoltá i shabat el prove se murió.
Korrió Djohá ande el amigo, yorando i le disho: «Asta ke lo ambezí al azno a no komer una semana entera, ensupitó se murió!»
I Djohá se metió en lutio de su azno fiyel.
Kontado por MEIR OHANA – 2015
Redaktado i tradusido al ladino por MATILDA KOEN-SARANO
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
