eSefarad Noticias del Mundo Sefaradi
Diplomasía salvadora
Un león estava kaminando en la shara, kuando enkontró un azno.
Le disho: «Mete tu narís adientro de mi boka i dime si está fediendo o no.»
El azno metió la narís adientro de la boka del león i pensó ‘Si le digo ke está fediendo, él me va komer’ i le disho: «No, sinyor león, no está fediendo del todo.»
«Mintirozo!» le disho el león i se lo komió en un bokado.
El león yamó al kavayo ke estava ayá i le disho: » Mete tu narís adientro de mi boka i dime si está fediendo o no.»
El kavayo pensó: ‘Le diré la verdá, ansí él no me va komer.’ i le disho: «Sí, sinyor león, tu boka tiene una fedor terrible!»
«Kualo?» le disho el león «Komo tienes la ozadía de dizirme esto?» i se lo komió pishín.
Agora vino el torno de la rapoza i el león le disho: » Mete tu narís adientro de mi boka i dime si está fediendo o no.»
Le disho la rapoza: «Sinyor león, yo ay tres días ke esto desfriada i no puedo sintir dinguna golor…»
Kontado por MATILDA KOEN-SARANO – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
