eSefarad Noticias del Mundo Sefaradi
Ayá es ansí
Un rabino se murió i suvió al Gan-Eden. Le dieron un apartamento de dos kamaretas.
El estava kontente, ma kuando salió a kaminar vido ke un vizino suyo, ke a su opinión era bastante ordinario, resivió un verdadero palasio.
El rabino yamó al malah Gavriel i le disho: «No es ke kero kesharme, ma komo fue ke este vizino mío resivió un palasio i yo sólo apartamento de dos kamaretas? En kualo él es mijor de mí?»
Le disho el malah Gavriel: «Te diré: Kuando tú davas tus drashás, todos los ke estavan en el kal se durmían, mientres ke kuando él giava el otobús – porké era shofër de otobús – a kada buelta todos los ke estavan en el otobús dizían: – Shemá Israel! Shemá Israel!»
Kontado por MATILDA KOEN-SARANO – 2014
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
