eSefarad Noticias del Mundo Sefaradi
Viaje de plazer
Una vez el rebbí [1] del puevlo yamó a los miembros de la komunidad djudía i los propuzo de azer un viajo de plazer por mar en barko.
Kuando yegó el momento, s’embarkaron en el barko, i el barko salió i eyos estavan disfrutando del viajo.
De pronto, después de unos días de viajo en el barko, el mar se puzo un poko raro, i se puzo kon muncha tempesta. Entonses notaron de ke el barko no respondía i se estava undiendo, i se estava yendo a las fondinas de la mar.
Los djudiós le pidieron al rebbí: “Rebbí, de esta gezerá [2] mos tienes ke sakar! Ansina es ke prepárate i vez avlar al kapitán, i mozotros estamos dispuestos a dar toda muestra fortuna, todo muestro dinero por muestras vidas”.
Entonses el rebbí se fue a avlar al kapitán. Le dize el rebbí: “Mi kapitán, kiero ke agas todos lo posible para salvar a estos judiós de esta gezerá, i todos mozotros te daremos, kada uno i uno (i avían mil dozientos judiós)… te daremos sien monedas de oro”.
Entonses el kapitán lo dize: “Mira, yo tengo una responsabilidad kon Usted i también kon los kristianos ke están akí en el barko, ansina es ke v’azer todo lo posible. Peró no veyo komo está la koza. La koza está muy mala!”
Enfín el kapitán izo todo lo umanamente posible, para salvar a los judiós i a los kristianos de este viajo, i kon musha difikultá i musho problema yegaron a puerto i yegaron a Tierra Santa.
Entonses el kapitán estava muy kontento. Arivaron al puerto, i él se metió al lado se la skalerita por ande abashan los pasajeros. I komesaron a bahar todo el mundo. I baharon dozientos judiós. Le miravan al kapitán, no le azían kavzo, asta ke baharon mil dozientos, todos judiós!
I el kapitán diziendo: “Kayido del mazal [3] d’estos judiós! Siempre son los mizmos! Siempre dizen una koza i azen otra. No te dan nada, ni te azen kavzo!”
Ya bahó todo el mundo i de pronto akí está el rebbí, shikitiko, kon una maleta, baha, se aserka al kapitán, le dize: “Mi kapitán, lo prometido es sagrado. Akí tiene Usted su dinero!”
El kapitán se keda viendo al rebbí i le dize: “Rebbí, yo siempre dihe ke Ustedes, los judiós, nunka aveis matado a Jezú Kristo, peró sí ke le aveis esho de sufrir!”
—————————————
[1] rebbí: (del ebreo: rav): rabino [2] gezerá: (en ebreo): sentensia [3] mazal: (en ebreo): suerteKontado por MORDEHAY (MARCO) BENDELAC – 1998
Redaktado por Matilda Koén-Sarano
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
