Las Notas de Matilda – Kuento: Kual es el mejor?

Kual es el mejor?

Los talmidim de tres hahamim están platikando.

Dize uno: «Mi rabino es el mas santo de todos.»

Dize el otro: «Tu rabino no vale nada en konfronto al mío. El mío es el mejor del mundo!»

El tresero sta oyendo.

Dize el uno: «Porké tú dizes ke tu rabino es el mejor del mundo?»

«Mira,» dize el otro, «stávamos kaminando en la kaye. Ensupitó empesó una luvia… mos ívamos a empapar. Mi rabino izo un sírkulo en basho. Nos disho: – En este sírkulo no va kaer la luvia. Metevos dentro. Afuera va yover mucho!»

Dize el uno: «Mi rabino es mas santo k`el tuyo. Stávamos en la yeshivá. Vino un fuego grande. Dize el rabino: – Metevos dentro de este sírkulo. No vos va pasar nada!- I se kemó toda la yeshivá i nozotros nada!»

Dize el tresero: «Mi rabino es el mejor de todos! Savésh ke pasó? Stávamos kaminando todos los talmidim kon él en shabbat. De repente vemos en basho una bolsa kon dukados. Dize el rabino: – En este sírkulo es djueves. Afuera es shabbat!-«

Kontado por ELI MENASE – 1996
Redaktado por MATILDA KOEN-SARANO

———————————————————————-

Kada semana, Matilda Koen Sarano mos konta sovre kuentos, muzika i otras kozas ke eya va arekojendo…